Filippində orta məktəblərin birində yeniyetmələrin törətdikləri silahlı hücum nəticəsində azı üç nəfər həyatını itirib, daha beş nəfər isə xəsarət alıb.
Oxu.Az xəbər verir ki, bu barədə "Inquirer" portalı yerli polisə istinadən məlumat yayıb.
Bildirilib ki, qanlı insident Leyte əyalətinin Takloban şəhərində yerləşən təhsil müəssisəsində qeydə alınıb.
Yerli polisdən bildirilib ki, hadisə baş verən kimi şübhəli şəxslərdən biri hadisə yerində ələ keçirilib.
Hüquq-mühafizə orqanlarının əməkdaşları digər şübhəlini isə təhsil müəssisəsindən bir qədər aralıda tutmağa nail olublar. Onun gizləndiyi yer barədə asayiş keşikçilərinə ətrafda yaşayan vətəndaşlar xəbər veriblər.
Bütün zərərçəkənlər təcili olaraq tibb müəssisələrinə çatdırılıb, ölənlərin şəxsiyyəti hələlik açıqlanmır. Hazırda polis cinayətin başvermə səbəblərini və xüsusilə də hadisənin motivlərini araşdırır.
