Noyabr ayının birinci yarısında Filippində tüğyan edən "Kalmaeqi" və "Funq-Vonq" tayfunlarının qurbanlarının sayı 297 nəfərə çatıb.
Oxu.Az xəbər verir ki, bu barədə PNA agentliyi Milli Fəlakət Riskinin Azaldılması və İdarə Edilməsi Şurasının məlumatlarına istinadən məlumat yayıb.
Qeyd olunur ki, "Kalmaeqi" tayfunu nəticəsində ölənlərin sayı 269-a satıb. Onların əksəriyyəti ölkənin mərkəzi hissəsində yerləşən Sebu adasının sakinləridir. "Funq-Vonq" tayfunu isə ölkənin doqquz əyaləti və bir regionunda 28 nəfərin həyatına son qoyub. İki tayfun nəticəsində ümumilikdə 575 nəfər xəsarət alıb, daha 115 nəfər hələ də itkin düşmüş hesab olunur.
Xatırladaq ki, "Kalmaeqi" tayfunu noyabrın 4-də Filippinə zərbə vurub. 53 yaşayış məntəqəsində fövqəladə vəziyyət rejimi elan edilib. Daha sonra Filippin Prezidenti Ferdinand Markos respublikada milli fəlakət rejimi elan edib. "Funq-Vonq" supertayfunu isə noyabrın 9-da Filippinə zərbə vurub. Respublikanın 1.4 milyondan çox sakini təxliyə edilib. Güclü külək elektrik ötürücü xətlərini zədələyib, nəticədə ölkənin 12 regionunda təxminən 3 milyon insan elektrik enerjisiz qalıb.
