Finlandiyanın Laplandiya da daxil olmaqla bir neçə bölgəsində qeyri-adi işıq fenomeni qeydə alınıb.
Oxu.Az xəbər verir ki, bu barədə "Iltalehti" nəşri yerli polisə istinadən məlumat yayıb.
Məlumata görə, kütləvi işıq müşahidələri barədə məlumatlar gecə saatlarında daxil olmağa başlayıb. İşıq saçan obyekti və səmada yelpik formalı ləkəni ölkənin bir neçə yaşayış məntəqələrinin sakinləri görüblər.
Əvvəlcə anomaliyanın yaranma səbəbi məlum olmayıb. Sonradan polislər ehtimal ediblər ki, sirli parıltı Rusiyanın Plesetsk kosmodromundan daşıyıcı raketin buraxılışı ilə bağlı ola bilər.
Aprelin 17-nə keçən gecə Rusiyanın Hərbi-Kosmik Qüvvələri Plesetsk kosmodromundan "Soyuz-2.1b" raketinin planlı buraxılışını həyata keçirib. Raket Rusiya Müdafiə Nazirliyi üçün kosmik aparatları orbitə çıxarıb.
