Fransada keçirilən yeni sorğunun nəticələrinə görə, respondentlərin əksəriyyəti 2027-ci ildə keçiriləcək prezident seçkisində "Milli Birlik" partiyasının parlament fraksiyasının lideri Marin Le Peni dəstəkləməyə hazırdır.
Oxu.Az xəbər verir ki, bunu "Le Figaro" qəzeti və LCI telekanalının sifarişi ilə Fransanın İctimai Rəy İnstitutu (IFOP) tərəfindən keçirilən sorğunun nəticələri göstərir.
İyulun 7-8-də 18 yaşdan yuxarı 984 nəfər arasında keçirilən sorğu, Paris Apellyasiya Məhkəməsinin parlament köməkçiləri işi üzrə Le Pen barədə qərarını açıqlamasından sonrakı ilk belə araşdırmadır. IFOP iki ssenari üzrə rəy alıb: hər iki halda sorğu iştirakçılarının 36 faizi Le Penə üstünlük verib. Onun əsas rəqibləri hesab olunan mərkəzçi "Renessans" partiyasının lideri Qabriel Attal 15 faiz, "Horizons" partiyasının rəhbəri Eduar Filip isə 19 faiz səs toplayıb.
İkinci turda da üstünlük Le Penin tərəfindədir: o, Filipə qarşı 54 faiz, Attala qarşı isə 55 faiz səs toplaya bilər. İnstitut həmçinin Le Penin Jan-Lük Melenşonla qarşılaşacağı üçüncü variantı da nəzərdən keçirib - bu halda Le Pen 70 faiz səs toplayaraq inamlı qələbə qazanır.
Xatırladaq ki, Paris Apellyasiya Məhkəməsi Le Penin seçkidə iştirakına qoyulan qadağa müddətini 15 aya endirib ki, bu da faktiki olaraq məhdudiyyətin aradan qalxması deməkdir. Məhkəmə həmçinin parlament köməkçiləri işi üzrə həbs cəzasını üç ilə endirib: bunun iki ili şərti, bir ili isə elektron qolbaq taxmaq şərtilə tətbiq olunub. Marin Le Pen 2027-ci il seçkisində iştirak edəcəyini və hökmü Kassasiya Məhkəməsində mübahisələndirəcəyini bəyan edib.
Baş prokuror Mari-Syuzann Le Keo isə prokurorluğun cəzanın yumşaldılması ilə bağlı qərardan şikayət verə biləcəyini bildirib. Lakin Kassasiya Məhkəməsinin yekun qərarına qədər Le Pen formal olaraq günahsız sayılır və seçki kampaniyasına başlaya bilər. Əgər məhkəmə seçkiyə qədər qərar verməsə və Le Pen qalib gəlsə, cəzanın icrası onun prezident səlahiyyətləri başa çatana qədər təxirə salınacaq.
