Fransanın cənubundakı Od departamentində baş verən genişmiqyaslı meşə yanğını nəticəsində ölən və yaralananlar var.
Oxu.Az-ın "BFMTV"yə istinadla verdiyi xəbərə görə, bu barədə departamentin rəsmisi Lüsi Reş bəyan edib.
Onun sözlərinə görə, yanğın çox sürətlə yayılır və artıq 11 min hektarlıq ərazini əhatə edib.
"Bu ərazi təxminən Parisin sahəsinə bərabərdir. Hazırda alov son dərəcə aktivdir və sürətlə yayılır", - deyə nümayəndə izah edib.
Təbii fəlakət nəticəsində bir qadın həyatını itirib. Onun evakuasiya olunmaqdan imtina etdiyi bildirilir. Bir nəfər isə itkin düşüb. Doqquz nəfər xəsarət alıb, onlardan biri ağır yanıq xəsarətləri alıb, vəziyyəti kritikdir. Xəsarət alanların yeddisi yanğınsöndürəndir.
Minlərlə ev elektrik enerjisiz qalıb, 1 500 nəfər isə müvəqqəti sığınacaqlara yerləşdirilib.
Təbii fəlakət avqustun 5-də başlayıb. Şahidlər yanğının qəfil baş verdiyini və alovun onlarla metr hündürlüyə qalxdığını bildiriblər. Rəsmi qurumlar bunun yayın ən böyük yanğını adlandırıblar və quraqlıq səbəbindən onun söndürülməsinin son dərəcə çətin olduğunu açıqlayıblar.
Hadisə yerində təxminən 1 800 yanğınsöndürən alovun qarşısını almağa çalışır. Onlara havadan altı təyyarə və bir helikopter dəstək verir.
Yanğınla mübarizə tədbirləri davam etdirilir. Yerli hakimiyyət orqanları təhlükədə olan digər ərazilərdə də evakuasiya tədbirlərini gücləndirib.
