ABŞ-də Federal Təhqiqatlar Bürosu (FTB) məlumatlara çıxışı olan keçmiş, habelə indiki ABŞ rəsmilərini casusluğa cəlb etmək məqsədi daşıdığı və Çin agentləri tərəfindən yönləndirildiyi iddia olunan 10-dan çox veb-saytı müsadirə edib.
Oxu.Az xəbər verir ki, bu barədə CNN məlumat yayıb. Müsadirə ilə bağlı FTB-nin rəsmi açıqlamasına əsasən, bir neçə naməlum şəxs bu saytlardan pul müqabilində həssas və ya məxfi məlumatları əldə etmək üçün ABŞ-də insanları əməkdaşlığa cəlb edən resurs kimi yararlanıblar.
İddialara görə, həmin platformalarda "beynəlxalq əlaqələr analitiki (məsafədən)", "müdafiə üzrə analitik", "keçmiş hərbi qulluqçular üçün işlər", həmçinin "ümumi "məsləhətçi" kimi vakansiyalar elan edilib. Sənəddə veb-saytlar vasitəsilə işə götürülən yeddi naməlum şəxsin adı çəkilir. Bildirilir ki, işəgötürənlər onlardan Çin və ABŞ münasibətləri, İran, eləcə də İsrail-Fələstin müharibəsi kimi müxtəlif mövzularda sənədlər tələb edib, eyni zamanda daxili və ya eksklüziv məlumatlar almaq üçün təzyiq göstəriblər.
FTB güman edir ki, xaricdə yerləşən və bu qanunsuz sxemi idarə edən şəxslər Çin hökuməti adından bilərəkdən və ya bilməyərəkdən hərəkət ediblər. Məqalədə qeyd olunub ki, ölkənin Ədliyyə Nazirliyi sözügedən saytları idarə edənlərin hər hansı bir xarici hökumətlə əlaqələrini inkar edib.
Xəbərə görə veb-saytların xərcləri kriptovalyuta və xarici banklar vasitəsilə ödənilib. Bu iddia edilən plan çərçivəsində hər hansı məxfi materialın paylaşılıb-paylaşılmadığı hələlik aydın deyil.
FTB-nin məlumatına görə, təşkilatçılar həssas kəşfiyyat məlumatlarına çıxış əldə etmək cəhdlərində süni intellekt tərəfindən yaradılmış foto və videolar, eləcə də tədqiqat hesabatları üçün nisbətən böyük məbləğdə ödənişlərdən istifadə ediblər. İddialara əsasən, veb-saytlardan birində "Anchorman" komediya filminin aktyor heyətinin, o cümlədən Uill Ferrellin canlandırdığı Ron Burqandi və Stiv Karelin Brik Tamland personajlarının saxta rəyləri yerləşdirilib.
