Futbol üzrə 2026-cı il dünya çempionatının açılış matçı ərəfəsində hakimiyyət Mexikoda stadion və nəqliyyat infrastrukturuna girişi çətinləşdirə biləcək planlaşdırılan etiraz aksiyalarına görə genişmiqyaslı təhlükəsizlik tədbirləri həyata keçirib.
Oxu.Az xəbər verir ki, bu barədə "Bloomberg" məlumat yayıb.
Məlumata əsasən, Meksika Prezidenti Klaudiya Şeynbaum vəziyyətin nəzarət altında olduğunu və açılış mərasiminin pozulmadan keçiriləcəyini bildirib. Eyni zamanda hakimiyyət azarkeşlərə stadiona əvvəlcədən yola düşməyi tövsiyə edib. Açılış matçına təxminən 90 min tamaşaçının gələcəyi gözlənilir.
Turnirin startı günü Mexikoda bir çox fərqli yürüş keçirilə bilər. Etirazçılar arasında müəllimlər, fermerlər, təqaüdçülər, tibb və nəqliyyat sahəsinin işçiləri var.
Asayişi təmin etmək üçün Mexikoya 50 mindən çox polis cəlb edilib. FIFA prezidenti Canni İnfantino Meksika hakimiyyətinə turnirə hazırlığa görə təşəkkür edib və etiraf edib ki, bu miqyaslı tədbir zamanı çətinliklərdən tamamilə qaçmaq praktiki olaraq mümkün deyil.
Qeyd edək ki, DÇ-2026 ilk dəfə eyni anda üç ölkədə - Meksika, ABŞ və Kanadada keçiriləcək.
Futbol üzrə dünya çempionatının (DÇ-2026) rəsmi açılış günündə - iyunun 11-də Meksikanın paytaxtında yeddi irimiqyaslı etiraz aksiyasının keçirilməsi planlaşdırılır.
Oxu.Az xəbər verir ki, bu barədə "El Universal" nəşri məlumat yayıb.
Qəzetin məlumatına əsasən, gözlənilən yürüşlərə səhiyyə və təhsil sahəsinin işçiləri, nəqliyyat sektorunun əməkdaşları, fermer birlikləri, dövlət enerji müəssisələrinin təqaüdçüləri, eləcə də itkin düşmüş uşaqlarını axtaran analar cəmiyyətlərinin nümayəndələri qatılacaqlar.
Nümayişçilərin Mexikonun cənubundakı müxtəlif məkanlardan, o cümlədən yerli universitetlərdən birinin ərazisindən və mərkəzi yollardan hərəkətə başlayaraq, turnirin ilk oyununun keçiriləcəyi stadiona doğru irəliləməsi ehtimal olunur.
Şəhər rəhbərliyi yolların kütləvi şəkildə bağlanacağı ilə bağlı xəbərdarlıq edib və tamaşaçıların arenaya girişinə nəzarət etmək məqsədilə idman qurğusu ətrafında xüsusi təhlükəsizlik kordonları qurmağı planlaşdırır.
Bir müddət əvvəl Meksika Prezidenti Klaudiya Şeynbaum DÇ-2026-nın keçiriləcəyi müddətdə dövlət qurumlarının asayişi və təhlükəsizliyi tam təmin edəcəyini bildirib və hökumətin etirazçılara qarşı güc tətbiq etməyəcəyini xüsusi vurğulayıb. Öz növbəsində, Mexiko şəhərinin meri Klara Bruqada paytaxt sakinləri və qonaqlarının təhlükəsizliyinə və söz azadlığı hüququna zəmanət verdiyini açıqlayıb. Onun sözlərinə görə, şəhər meriyası təxribatlara yol verməyəcək, polis qüvvələri yalnız qalxanlar, qoruyucu vasitələr və yanğınsöndürənlərlə təchiz ediləcək.
Mer qeyd edib ki, hökumət insanların öz fikrini ifadə etmə azadlığı ilə milyonlarla azarkeşin ictimai və idman obyektlərinə sərbəst daxil olmaq hüququ arasında tələb olunan tarazlığı qoruyacaq.
