"2025-ci ildə Rusiya bazarında təqdim olunan "Orimi" şirkətlər qrupunun hazır çay məhsullarında pestisidlərin qalıq tərkibinin norma həddini aşması faktı aşkar edilməyib".
Bunu Oxu.Az-a açıqlamasında "Greenfield", TESS, "Prinsessa Nuri", "Prinsessa Yava" və digər brendlər altında çay istehsal edən "Orimi" şirkətlər qrupunun korporativ kommunikasiyalar üzrə direktoru Mariya Drabova bildirib.
"Qanunvericiliyə uyğun olaraq, Avrasiya İqtisadi İttifaqında və Rusiya Federasiyasında istifadə olunan xammalda və hazır məhsullarda pestisidlərin qalıq miqdarlarının məcburi nəzarəti həyata keçirilir. Gömrük İttifaqının Texniki Reqlamentinin (TR TS 021/2011) "Qida məhsullarının təhlükəsizliyi haqqında" tələblərinə əsasən, iki pestisid daimi məcburi nəzarətə məruz qalır. Digərlərinə isə "Orimi" şirkətlər qrupuna xammal tədarükü üzrə bütün müqavilələrdə əks olunan bu tələbə əsasən, tədarük zəncirinin bütün iştirakçıları tərəfindən məcburi qaydada təqdim edilən tətbiq haqqında məlumatlara uyğun nəzarət edilir. Bundan əlavə, "Orimi" şirkətlər qrupu daim tədarükçülərin çay məhsulları partiyalarından seçmə üsulla xammal götürərək laboratoriyalarda yoxlayır", - M.Drabova əlavə edib.
Rusiyada məşhur çay markaları təhlükəli toksinlər səbəbindən gündəmə gəlib.
Oxu.Az bu barədə "360.ru" "Telegram" kanalına istinadla xəbər verir.
Bildirilir ki, son səkkiz ay ərzində "Rospotrebnadzor" təhlükəli pestisidlərlə çirklənmiş 111 ton çay məhsulunu dövriyyədən çıxarıb.
Şübhəli istehsalçılar arasında "Tess", "Greenfield" və "Zolotaya çaşa" kimi tanınmış brendlərin də adı keçir.
Mütəxəssislər bildirirlər ki, təhlükəli məhsulla qarşılaşmaq riski nisbətən aşağı olsa da, sağlamlığa təsirləri olduqca ciddi ola bilər. Pestisidlər sinir sisteminə hücum edir, yaddaş və diqqəti zəiflədir, allergiyaya səbəb olur və hətta xərçəng xəstəliyinə yol aça bilər.
Güclü zəhərlənmə hallarında ürəkbulanma və başağrısından tutmuş huşunu itirməyə qədər ağır simptomlar meydana gəlir.
