Gürcü Arzusu: "USAID parlament seçkisinə 42 milyon dollar vəsait ayırıb"

Gürcüstanın hakim Gürcü Arzusu Partiyasının üzvü Givi Mikanadze ABŞ Beynəlxalq İnkişaf Agentliyinin (USAID) Gürcüstanda keçirilən sonuncu parlament seçkisində müxalifəti maliyyələşdirmək üçün 42 milyon dollar vəsait ayırdığını açıqlayıb.

Oxu.Az xəbər verir ki, parlamentarinin açıqlamasını "Kavkazskiy Uzel" nəşri dərc edib.

G.Mikanadzenin sözlərinə görə, amerikapərəst və avropapərəst qüvvələr müxalifətin parlamentdə yer almasına kömək etmək məqsədilə ölkədə yalnız seçkiqabağı dövrə 42 milyon dollar vəsait xərcləyiblər. 

Öz növbəsində Gürcüstan parlamentinin spikeri Şalva Papuaşvili seçki prosesində müxtəlif qeyri-hökumət və qeyri-kommersiya təşkilatlarının ölkəyə pul göndərdiyini bəyan edib.

Tbilisi şəhərinin meri Kaxa Kaladze də gürcüstanlı siyasilərin mövqeyini dəstəkləyərək söyləyib ki, ölkədə ekstremizm, qarşıdurma və inqilab hazırlığı USAID-in timsalında ABŞ tərəfindən maliyyələşdirilir.