Gürcüstan Prokurorluğu: Qamsaxurdiya öldürülüb

İstintaq Gürcüstanın birinci prezidenti Zviad Qamsaxurdiyanın ölümü ilə bağlı işin maddəsini “sui-qəsd”dən “qətl” maddəsinə dəyişib. 

Bu barədə Gürcüstan KİV-i ölkənin Baş prokurorluğuna istinadla məlumat yayıb. 

Oxu.Az “İnterfaks”a istinadla xəbər verir ki, KİV-in məlumatına əsasən, artıq bir neçə aydır ki, prokurorluq yeni istintaq aparır, bir sıra tədbirlər həyata keçirib və bir neçə ölkəyə sorğular göndərib.

Dindirilmələr aparılıb, birinci prezidentin ölüm şəraiti araşdırılıb, Qamsaxurdiyanın ölüm yerinə yenidən baxış keçirilib.

Bununla yanaşı, birinci prezidentin oğlu Konstantin Qamsaxurdiya jurnalistlərə deyib ki, o və onun ailəsi prokurorluq nümayəndələri ilə görüşüb. 

Onun sözlərinə görə, prokurorluq nümayəndələri qeyd ediblər ki, 1994-cü ildən aparılan istintaq tamamilə qənaətbəxş deyil.

Qamsaxurdiyanın ölümü barəsində iş 1994-cü ilin fevralında qaldırılıb. 2009-2011-ci illərdə bu işlə bağlı parlamentdə müvəqqəti komissiya işləyirdi.

Ölkənin birinci prezidenti 1993-cü ildə dünyasını dəyişib. Rəsmi istintaq bəyan etmişdi ki, Qamsaxurdiya özünü qətlə yetirib, lakin birinci prezidentin tərəfdarları bu versiyaya inanmırlar.

www.oxu.az