Aprelin 2-də Marneuli şəhərində bıçaqlanan 20 yaşlı Ümid Bayramovun qətli ilə bağlı yeni detallar məlum olub.
Oxu.Az 24News.ge-yə istinadən xəbər verir ki, yerli sakinlər hadisəyə səbəb olan münaqişənin martın 26-da keçirilən toy məclisində başladığını bildiriblər.
Məlumata görə, ağır cinayəti törətməkdə ittiham olunan 22 yaşlı Emin Yusubov Ümid Bayramovu hələ toy günü qisas almaqla hədələyib. Dünən isə o, gənci evinin yaxınlığına çağıraraq bıçaqla boğazını kəsib. Hadisə şahidlərinin sözlərinə görə, ağır yaralanan Ümid çoxlu qan itirərək hadisə yerindəcə dünyasını dəyişib. Şahidlər bildirirlər ki, gənc qaçmağa çalışsa da, hücum edən şəxs onu yaxalayaraq qətlə yetirib.
Hadisənin şahidi olan sakinlərdən biri həmin anları belə təsvir edib: "Qışqırıq səsinə çölə çıxdım, artıq çox adam yığılmışdı. Dedilər ki, biri qaçırdı, digəri isə onu təqib edirdi. Yazıq hasardan tullanıb qaçmaq istəyirdi, amma çatmadı. Onu yaxalayıb boğazını kəsdi. Eşitdiyimə görə, aralarında problem toyda yaranmışdı. O vaxt mübahisə ediblər və qonşumuz ona "səni bağışlamayacağam" deyib. Beləcə qisas aldı".
Digər bir sakin isə yaralı gəncin təxminən yarım saat kömək istədiyini, lakin hamı qorxduğu üçün yaxınlaşa bilmədiyini qeyd edib:
"Qatil bıçaqla silahlandığı üçün hamı qorxurdu. Mən gələndə o artıq qaçmışdı. Təcili yardıma zəng etməyə belə çəkinirdilər. Mən zəng etdim, amma artıq gec idi - boğazındakı dərin kəsik səbəbindən hadisə yerində keçinmişdi".
Hadisə baş verən gün şəhərin mərkəzi xəstəxanasında da vəziyyət gərgin olub. Həkimlər gəncin həyatını xilas edə bilmədikdən sonra xəstəxana ərazisində qarşıdurma yaşanıb.
Aprelin 2-də Gürcüstanın Marneuli rayonunda Ümid Bayramovu öldürməkdə şübhəli bilinən, əvvəllər müxtəlif cinayət əməllərinə görə məhkumluğu olan 2004-cü il təvəllüdlü şəxs saxlanılıb.
Oxu.Az məlumat verir ki, bu barədə Gürcüstanın Daxili İşlər Nazirliyi məlumat yayıb.
Araşdırmalar zamanı aydın olub ki, Marneulidə baş verən davada təqsirləndirilən şəxs 2005-ci il təvəllüdlü Ümid Bayramovun boğazına bıçaqla zərbə endirərək ərazidən uzaqlaşıb. Təcili olaraq xəstəxanaya çatdırılsa da, onun həyatını xilas etmək mümkün olmayıb.
Hüquq-mühafizə orqanlarının əməkdaşları tərəfindən həyata keçirilən əməliyyat tədbirləri və istintaq hərəkətləri nəticəsində cinayət törətməkdə şübhəli bilinən şəxs qısa müddət sonra saxlanılıb. Gürcüstanda hadisə ilə bağlı cinayət işi açılıb, onu Cinayət Məcəlləsinin 108-ci maddəsi ilə 15 ilə qədər azadlıqdan məhrum etmə cəzası gözləyir.
Qeyd edək ki, Ü.Bayramovun bir neçə gün əvvəl toyu olub.
