Türkiyənin Konya şəhərində Azərbaycan hərbçilərinin də qatıldığı "Anadolu Ankası - 2026" ("Anatolian Phoenix - 2026") beynəlxalq axtarış-xilasetmə təlimi davam edir.
Oxu.Az xəbər verir ki, "Haber Global" telekanalı təlimlə bağlı süjet hazırlayıb.
Qeyd olunub ki, təlimdə Türkiyə, Azərbaycan, ABŞ, Polşa və Slovakiyanın ümumilikdə 519 hərbçisi iştirak edir.
Reportajda bildirilib ki, təlimə Azərbaycan iki "Su-25" döyüş təyyarəsi ilə qatılıb.
Təlimin məqsədi müxtəlif ölkələrin axtarış-xilasetmə qüvvələri arasında qarşılıqlı fəaliyyətin və operativ uyğunluğun artırılması, idarəetmə mexanizmlərinin təkmilləşdirilməsi, şəxsi heyətin peşəkar hazırlıq səviyyəsinin yüksəldilməsi, qəza vəziyyətlərində ekipaj üzvlərinin axtarılması və xilas edilməsi, suda və quruda, eləcə də çətin relyef şəraitində xilasetmə əməliyyatlarının effektiv icrası, pilotların təhlükəsiz təxliyəsi, havadan dəstəyin təmini və aviayönləndiricilərin fəaliyyətinin təkmilləşdirilməsi üzrə bacarıqların inkişaf etdirilməsidir.
Aprelin 17-nə qədər davam edəcək beynəlxalq təlimdə Azərbaycanı Hərbi Hava Qüvvələrinin pilotları, paraşüt-desant və axtarış-xilasetmə xidmətinin mütəxəssisləri, aviayönləndiricilər, texniki heyət və aviasiya vasitələri təmsil edir.
