İndoneziyanın şərqində baş verən zəlzələ və ardınca qeydə alınan afterşoklar nəticəsində ölənlərin sayı 68-ə çatıb, xəsarət alanların sayı isə 200-ü ötüb.
Oxu.Az "Reuters"ə istinadən xəbər verir ki, bu barədə Təbii Fəlakətlərin Fəsadlarının Aradan Qaldırılması üzrə Milli Agentlik məlumat yayıb.
Qurumun məlumatına görə, itkin düşənlərlə bağlı hər hansı müraciət daxil olmayıb. Bununla belə, mümkün qurbanların axtarışları davam etdirilir.
Hakimiyyət zərərçəkənlərə ərzaq, çadır və digər zəruri vasitələrdən ibarət humanitar yardım çatdırmaq üçün təyyarələr hazırlayıb.
Zəlzələ nəticəsində təxminən 500 evə ziyan dəyib. Ölkənin bir neçə rayonunda səhra xəstəxanalarının qurulması planlaşdırılır.
"Reuters"in son məlumatına görə, zəlzələdən sonra bölgədə təxminən 1 600 afterşok qeydə alınıb. Minlərlə insan təhlükəsizlik məqsədilə müvəqqəti sığınacaqlara yerləşdirilib.
İndoneziyanın cənub-şərq hissəsində qeydə alınan 7.7 bal gücündə zəlzələdə həyatını itirənlərin sayı 53 nəfərə yüksəlib, daha 137 nəfər isə yaralanıb.
Oxu.Az-ın verdiyi məlumata görə, bu barədə "Tempo" portalı ölkənin Təbii Fəlakətlərin İdarə Olunması üzrə Milli Agentliyinə istinadən xəbər yayıb.
Agentliyin fövqəladə hallar üzrə məlumat, informasiya və rabitə mərkəzinin rəis əvəzi Berton Pancaitanın bildirdiyinə görə, təbii fəlakət nəticəsində 2 400 ev zədələnib ki, onların da 1 500-nə ciddi ziyan dəyib. Təxliyə məntəqələrinə 5 488 insan yerləşdirilib, 171 nəfər isə müstəqil şəkildə təhlükəsiz əraziyə keçib.
Qurum rəsmisi əlavə edib ki, avqustun 15-də Şərqi Nusa-Tenqara əyalətində baş verən yeraltı təkanlar nəticəsində 87 təhsil müəssisəsi, 50 dini obyekt, 76 dövlət idarəsi və bir sıra digər ictimai binalar zərər görüb.
İndoneziyanın Meteorologiya, İqlimşünaslıq və Geofizika Agentliyinin rəhbəri Teuku Faysal Fataninin sözlərinə görə, əsas zəlzələdən sonra 1500-dən çox afterşok qeydə alınıb.
