"İyunun 23-də Beynəlxalq Atom Enerjisi Agentliyinin (BAEA) Rəhbərlər Şurasının ABŞ-nin İranın nüvə obyektlərinə endirdiyi zərbələrdən sonra bu ölkədəki vəziyyətə həsr olunmuş iclası keçiriləcək".
Oxu.Az xəbər verir ki, bu barədə BAEA-nın baş direktoru Rafael Qrossi "X" sosial şəbəkə hesabında yazıb.
"İrandakı fövqəladə vəziyyətlə əlaqədar mən sabah BAEA-nın Rəhbərlər Şurasının təcili iclasını çağırıram", - deyə o vurğulayıb.
ABŞ-nin İranın Fordo, Natanz və İsfahandakı nüvə obyektlərinə endirdiyi zərbələrdən sonra rəsmi Tehran Beynəlxalq Atom Enerjisi Agentliyinin Rəhbərlər Şurasının təcili iclasını çağırıb.
Oxu.Az xəbər verir ki, bu barədə İran Xarici İşlər Nazirliyinin bəyanatında deyilir.
"Bu gün müharibə edən tərəflərin xeyrinə açıq qərəzli mövqe nümayiş etdirən və bununla da fəlakətə səbəb olan BAEA və şəxsən baş direktor Rafael Qrossinin məsuliyyəti həmişəkindən daha aydındır.
Biz Agentliyin Rəhbərlər Şurasını növbədənkənar iclas keçirməyə və ABŞ-nin İranın nəzarəti altında olan nüvə obyektlərinə təhlükəli hücumu ilə bağlı qanuni öhdəliklərini yerinə yetirməyə çağırırıq", - deyə məlumatda vurğulanır.
