İran hakimiyyəti təhlükəsizlik səbəbi ilə ölkənin qərb hissəsində hava məkanının bağlanması barədə qərar qəbul edib.
Oxu.Az xəbər verir ki, bu barədə İran Mülki Aviasiya Təşkilatının nümayəndəsi Məcid Əxvan məlumat verib.
Onun sözlərinə görə, təhlükəsizlik vəziyyətinin qiymətləndirilməsindən sonra yayımlanan NOTAM bildirişi əsasında ölkənin hava məkanının qərb sektoru növbəti bildirişədək bağlanıb.
Məcid Əxvan vətəndaşları zəruri ehtiyac olmadığı təqdirdə hava limanlarına getməməyə, reyslərlə bağlı məlumatları isə KİV vasitəsilə izləməyə çağırıb.
Qeyd edək ki, bundan əvvəl İsrail ordusu İran ərazisindən raket buraxılışlarının qeydə alındığını açıqlamışdı. İsrail tərəfi hücuma cavab veriləcəyini bəyan edib.
İran isə raket zərbələrinin İsrailin Beyruta endirdiyi hücumlara cavab olaraq xəbərdarlıq xarakteri daşıdığını bildirib.
