ABŞ Prezidenti Donald Tramp İranın İsrailə raket hücumunu şərh edib.
Oxu.Az xəbər verir ki, o, "Fox News" telekanalına açıqlamasında Tehrana danışıqlar masasına qayıtmağı tövsiyə edib.
"İrana deyirəm: siz artıq kifayət qədər atəş açmısınız, bəsdir. İndi isə danışıqlar masasına qayıdın", - deyə Tramp bildirib.
ABŞ lideri əlavə edib ki, İranla bağlı gərginlik fonunda Amerika hərbçiləri yüksək hazırlıq vəziyyətinə gətirilib.
Tramp eyni zamanda İsrail ərazisinə raket hücumuna cavab olaraq Netanyahunu İrana hücum etməkdən çəkindirmək istədiyini bildirib:
"İndi Netanyahuya zəng edib deyəcəyəm ki, İrana cavab olaraq hücum etməsin".
İranın İsrail istiqamətində raketlər buraxmasından sonra İordaniya ərazisində də hava həyəcanı siqnalları işə salınıb.
Bundan əlavə, Suriyanın paytaxtı Dəməşq üzərində partlayış səslərinin eşidildiyi bildirilir.
* SON DƏQİQƏ: İran İsrailə raket atdı: Təl-Əviv cavab zərbəsinə hazırlaşır - VİDEO
Xatırladaq ki, bundan əvvəl İsrail ordusu İran ərazisindən raket buraxılışlarının qeydə alındığını və hava hücumundan müdafiə sistemlərinin işə salındığını açıqlamışdı. İran isə hücumun İsrailin Livana endirdiyi zərbələrə cavab xarakteri daşıdığını bəyan edib.
