İsrailin Baş naziri Benyamin Netanyahu bir neçə gün əvvəl ölkənin "Channel 14" kanalına müsahibəsində oğluna qarşı sui-qəsd cəhdindən danışıb, lakin hədəfin hansı oğlu olduğunu açıqlamayıb. Netanyahu bu hadisəni inanılmaz bir məsələ adlandıraraq deyib: "İran oğullarımdan birini hədəfə aldı. İran onu öldürməyə cəhd etdi". Netanyahunun bu qısa açıqlamasından az sonra məsələnin yeni təfərrüatları üzə çıxıb.
Oxu.Az xəbər verir ki, bu barədə "Azad İran" "YouTube" kanalının hazırladığı videosüjetdə bəhs edilir.
"Belə ki, ABŞ-nin "Newsmax" kanalı srağagün, avqustun 26-da məlumat yayıb ki, İran agentləri İsrailin baş nazirinin böyük oğlu Yair Netanyahunun ABŞ-də yaşadığı dövrdə ona qarşı sui-qəsd hazırlanması və həyata keçirilməsi planı üzərində işləyiblər.
Bu məlumat Benyamin Netanyahunun daha əvvəl verdiyi açıqlamaya yeni detallar əlavə edib. İşin təfərrüatlarından agah olan və ABŞ hüquq-mühafizə orqanlarında çalışan bir mənbənin "Newsmax"a verdiyi məlumata görə, əsas hədəf İsrail baş nazirinin 35 yaşlı böyük oğlu olub. Yair həmin dövrdə Floridanın cənubundakı Hallandeyl-Biçdə yaşayırmış.
Mənbənin sözlərinə əsasən, İsrail kəşfiyyat xidməti ötən ilin dekabr ayında Tehran tərəfindən Yairə qarşı hazırlanan planı aşkar edib və bu barədə ABŞ rəsmilərini məlumatlandırıb. Həmin şəxsin bildirdiyinə görə, İrana bağlı kəşfiyyat qrupu qabaqcadan Mayami bölgəsində yerləşib və Yairin gündəlik fəaliyyətini, eləcə də yaşadığı yeri müşahidə altına alıb. Mənbə bildirib ki, Yairi daim İsrailin təhlükəsizlik işçiləri müşayiət etsə də, sui-qəsd planı ifşa olunan kimi ona ərazini tərk etmək əmri verilib. O, əşyalarını belə toplamağa imkan tapmadan dərhal İsrailə qayıdıb və hazırda da oradadır", - deyə materialda bildirilir.
