İspaniyanın xarici işlər naziri Xose Manuel Albares İtaliyanın ölkəsindəki səfirini rəhbərlik etdiyi quruma çağırdığını bildirib. Buna səbəb Albaresin italiyalı həmkarı Antonio Tayaninin İspaniyanın muxtar şəhəri Seutada miqrant axını ilə əlaqədar Madridlə Şengen sazişinin fəaliyyətini dayandırmaq niyyəti barədə səsləndirdiyi fikirlər olub.
Oxu.Az xəbər verir ki, bu barədə yerli media məlumat yayıb. Bir müddət əvvəl Tayani Seutadakı miqrasiya böhranının bütün Avropanın milli təhlükəsizliyi üçün təhdid yarada biləcəyini əsas gətirərək, İspaniya ilə Şengen müqaviləsinin dayandırılması ideyasını dəstəkləyib.
"Bu bəyanat Avropa həmrəyliyi gözlədiyimiz dost və tərəfdaş ölkənin xarici işlər nazirinə yaraşmır. Mən İtaliyanın səfirini XİN-ə çağırdım", - deyə Albares "X" sosial şəbəkəsində yazıb.
İspaniya mətbuatının daha əvvəl verdiyi məlumata görə, son bir həftə ərzində 1 500-dən çox miqrant Mərakeşdən Seutaya üzərək, digərləri isə bu məsafəni piyada qət edərək gəliblər. Bəzi mənbələrə görə, muxtar şəhərə 20 000-ə yaxın insan daxil ola bilər. Hələlik gələnlərin dəqiq sayı açıqlanmır. Böhran fonunda İspaniya rəhbərliyi yaşayış məntəqəsində təhlükəsizliyin təmin edilməsinə kömək məqsədilə hərbçiləri cəlb etmək qərarına gəlib. İyulun 31-də İspaniya hökumətinin sədri Pedro Sançes və daxili işlər naziri Fernando Qrande-Marlaskanın Seutaya səfər edəcəyi gözlənilir.
