İspaniyada hakim Xuan Karlos Peynado ölkənin Baş naziri Pedro Sançesin həyat yoldaşı Beqonya Qomeslə bağlı iş çərçivəsində yeni istintaq xəttinin açılmasına qərar verib.
Oxu.Az-ın xəbərinə görə, bu barədə "Europa Press" agentliyi məlumat verib.
Onun versiyasına əsasən, söhbət Avropa fondları tərəfindən maliyyələşdirilən bir sıra müqavilələrdə ehtimal edilən pozuntular səbəbindən Avropa İttifaqının maraqlarına xələl gətirəcək mümkün vəzifə cinayətlərindən və fırıldaqçılıqdan gedir.
Eyni zamanda, hakim hələ Qomesin işin digər istiqamətləri üzrə təqsirləndirilən şəxslər skamyasına göndərilib-göndərilməməsi ilə bağlı qərarını açıqlamayıb. O, iyunun 15-də keçirilən ilkin dinləmədə iştirak edib. Baş nazirin həyat yoldaşı mənimsəmə, əlaqələrdən sui-istifadə, ticarət nişanının qeyri-qanuni mənimsənilməsi və biznes korrupsiyasında şübhəli bilinir.
"Europa Press" agentliyinin məlumatına görə, hakimin Sançesin həyat yoldaşı ilə bağlı araşdırması bir neçə istiqamət üzrə aparılıb. Onlardan biri Qomesin əlaqələrindən iş adamı Xuan Karlos Barrabesin maraqları naminə istifadə edilməsi ilə, digəri isə baş nazirin həyat yoldaşının Madridin Komplutens Universitetindəki fəaliyyəti ilə bağlıdır.
Bundan əlavə, Peynado bu təhsil müəssisəsi kafedrasının proqram təminatının qeyri-qanuni mənimsənilməsi iddiasını, eləcə də Kristina Alvaresin Beqona Qomesin müşaviri təyin edilməsini araşdırırdı.
Prokurorluq işin ləğv edilməsini tələb edirdi və xəbərdarlıq edirdi ki, əgər məhkəmə iş prosesinin açılmasına qərar verərsə, şübhəlilər üçün bəraət hökmünün çıxarılmasına çalışacaq. Öz növbəsində Qomesə qarşı məhkəmə iddiası qaldıran ifrat sağçı "Hazte Oír" assosiasiyası ona 24 il azadlıqdan məhrumetmə cəzasının verilməsini istəyirdi.
