İspaniyalı jurnalist Tomas Roncero: "Arda Güler Qutinin DNT-sinə sahibdir"

İspaniyalı "As" qəzetinin jurnalisti Tomas Roncero "Xetafe" ilə oyunda "Real Madrid" klubuna qalibiyyət qazandıran türkiyəli futbolçu Arda Güler barədə maraqlı fikirlər səsləndirib.

Bu barədə Oxu.Az "Haber Global"a istinadən xəbər verir.

Məlumata görə, Tomas Roncero məqaləsində "Real Madrid"in kritik qələbəsi və qolu vuran Arda Güler ​​haqqında yazıb.

Jurnalist bildirib ki, Arda Güler Qutinin DNT-sinə sahibdir (Quti - yarımmüdafiəçi mövqeyində oynayan keçmiş peşəkar ispaniyalı futbolçu. Daha çox İspaniyanın "Real Madrid" klubunun oyunçusu kimi tanınır - red.).

"Madrid"in sadə və orta səviyyəli futbol oynadığını deməzdən əvvəl qeyd etmək lazımdır ki, "Real" üç böyük komanda arasında bu mövsüm burada qalibiyyət əldə edə bilən yeganə komandadır. Digər tərəfdən, Gülerin möhtəşəm qolu və "Real Madrid"də çıxış edən dünyanın ən yaxşı qapıçısı Kurtuanın son dəqiqələrdə etdiyi iki qurtarış matçın nəticəsini müəyyən etdi.

Mən düşünürəm ki, Ardaya qarşı çox tələbkar olmaq lazımdır. O qədər istedadlıdır ki, daha iddialı və öz işinə daha çox bağlı olmalı olduğu qənaətindəyəm. "Xetafe" ilə matçda ondan gözlənilənləri göstərdiyi göz qabağındadır, xüsusilə də ilk hissədə oyunda üstünlüyü ələ keçirdi və qalibiyyəti gətirən qızıl qolla uğurunu tamamladı. Güler Qutinin DNT-sinə sahibdir. Daha intensiv və ardıcıl oynamağı öyrənsə, "Real Madrid" üçün əhəmiyyətli bir oyunçu olacaq", - deyə Tomas Roncero qeyd edib.

Bildirək ki, "Real Madrid" "Xetafe"yə 1:0 hesabı ilə qalib gəlib və yeganə qolun müəllifi də Arda Güler olub.