İsrail rəhbərliyi 2010-cu ildə Aralıq dənizində həyata keçirilən “Azadlıq donanması” əməliyyatı zamanı həlak olmuş Türkiyə vətəndaşlarının ailələrinə 20 milyon dollar həcmində maddi vəsait ödəməyə hazırdır.
Oxu.Az-ın Aze.az saytına istinadən verdiyi məlumata görə, İsrail “Azadlıq donanması” əməliyyatı zamanı həlak olmuş Türkiyə vətəndaşlarının ailələrinə 20 milyon dollar həcmində maddi vəsait ödəyəcək.
Humanitar yardım yükü ilə qaz sektorunun sahillərinə doğru hərəkət edən “Azadlıq donanması” 2010-cu ilin may ayının sonlarında ələ keçirilib.
Qaz sektoru istiqamətində irəliləməyə yol verilmədiyi barədə xəbərdarlıqdan sonra xüsusi təyinatlı birləşmə “Mavi Mərmərə” gəmisinin göyərtəsinə düşüb. Yaranan münaqişə nəticəsində 9 nəfər dünyasını dəyişib.
Bütün dünyada bu hadisə yaxşı qarşılanmasa da, İsrail rəhbərliyi öz hərəkətlərinin qanuni olduğunu iddia etməkdən çəkinmirdi. İsrailin Müdafiə Ordusunun (SAXAL) Baş Qərargah rəisi Qabi Aşkenazi əməliyyat üzrə bütün məsuliyyəti öz üzərinə götürüb.
2013-cü ilin mart ayında Türkiyə və İsrail arasında münasibətlərin normallaşdırılması üzrə razılıq əldə olundu.
İsrailin baş naziri Benyamin Netanyahu Türkiyənin baş naziri Rəcəb Tayyib Ərdoğan ilə telefon söhbətində dəniz əməliyyatında yol verilən səhvə görə üzr istədi.
İsrail münaqişə zamanı həlak olmuş insanların ailələrinə 15 milyon dollar həcmində vəsait ödəməyi təklif edib. Ankaranın tələb etdiyi məbləğ isə 30 milyon dollar olub. Nəticədə, hər iki tərəf arasında 20 milyon dollar həcmində ödənişin edilməsinə dair razılıq əldə olunub.
