ABŞ yaxın vaxtlarda İrana hücum edə bilər. Bunun yaxın 24 saat ərzində baş verəcəyi ehtimal olunur.
Oxu.Az xəbər verir ki, bu barədə "Reuters" agentliyi iki Avropa məmuruna istinadən məlumat yayıb.
Məlumata görə, israilli bir məmur bildirib ki, ABŞ Prezidenti Donald Tramp İrana müdaxilə barədə qərar qəbul etmiş ola bilər.
Hərçənd, hücumun miqyası və müddəti hələ dəqiqləşdirilməyib.
"Reuters" agentliyi yüksəkvəzifəli İran rəsmisinə istinadən xəbər verir ki, İran amerikalı hərbçilərin olduğu qonşu ölkələrə xəbərdarlıq edib ki, əgər ABŞ-nin hücumu baş verərsə, həmin ölkələrdəki bazalara zərbə endiriləcək.
Bununla əlaqədar olaraq, ABŞ Yaxın Şərqdəki bazalarından personalın bir hissəsini çıxarmaq qərarına gəlib. Bu barədə amerikalı məmur jurnalistlərə məlumat verib.
Xüsusilə, bəzi əməkdaşlara yanvarın 14-ü axşama qədər Qətərdəki "Əl-Udeyd" ABŞ aviabazasını tərk etmək tapşırılıb. Agentliyin həmsöhbətlərindən biri dəqiqləşdirib ki, bu, təxliyə deyil, dislokasiyadır.
