Yəməndən olan silahlı qruplaşmalar müxtəlif növ ballistik raketlərin hazırlanması üçün "Claude" süni intellekt modelindən istifadə etməyə çalışıblar.
Oxu.Az "Financial Times" nəşrinə istinadən xəbər verir ki, bu barədə "Claude"un yaradıcısı "Anthropic" şirkəti kibertəhlükəsizliyə həsr olunmuş hesabatında bildirib.
Hesabatda birbaşa qeyd olunmasa da, söhbətin husilər getdiyi bildirilir.
Qeyd olunur ki, Yəməndə "Claude"dan "üç silah hazırlama proqramının düzəldilməsi" zamanı istifadə etməyə çalışıblar. Şirkətin məlumatına görə, xüsusilə modeldən ballistik raketlərin yönləndirilməsi, naviqasiyası, idarə edilməsi və sabitləşdirilməsi üçün nəzərdə tutulan proqram təminatının hazırlanmasında istifadə edilib. Bəzi hallarda "Claude"dan raketlərin uçuşunun modelləşdirilməsi üçün də istifadə olunub.
Hesabatda bildirilir ki,"Anthropic" bu cür sorğuların əksəriyyətini bloklasa da, bəziləri onun təhlükəsizlik sistemindən keçib. Şirkət bunu, xüsusən raket hazırlayanların öz fəaliyyətlərini gizlətməyə çalışması ilə izah edir. Məsələn, onlar sorğuları bir neçə sessiyaya bölüblər ki, söhbətin raketlərdən getdiyini anlamaq daha çətin olsun.
Eyni hesabatda "Anthropic" "Claude"dan rusiyalı və çinli hakerlər tərəfindən istifadə edildiyini də bildirib. Şirkət vurğulayır ki, ümumilikdə "Claude"dan odlu silahların, raketlərin, pilotsuz uçuş aparatlarının, bombaların, bioloji silahların və digər silah və sursat növlərinin hazırlanması üçün istifadə edilməsinə dair çoxsaylı cəhdlər aşkarlanıb.
