Konqo Demokratik Respublikasının (KDR) şərqində yerləşən Bukavu şəhərində baş verən dəhşətli yanğın nəticəsində ən azı 20 ibtidai sinif şagirdi həyatını itirib.
Oxu.Az xəbər verir ki, bu barədə "Okapi" radiostansiyası xəbər yayıb.
Məlumata görə, daha 50-yə yaxın məktəbli müxtəlif dərəcəli bədən xəsarətləri alıb. Tibb xidmətləri və yerli mənbələrin məlumatına əsasən, alov iki ibtidai məktəbin yaxınlığındakı yaşayış binasında başlayıb. Dərs vaxtı yanğın sürətlə təhsil müəssisələrinin binalarına keçib. Uşaqların əksəriyyəti birbaşa alovdan deyil, yaranmış təşviş səbəbindən ölüb.
Fəlakətin miqyası çox böyük olub. Yanğın nəticəsində xəstəxana da daxil olmaqla, 500-ə yaxın bina yanıb. Hazırda hadisənin başvermə səbəbləri araşdırılır.
Təxminən bir milyon əhalisi olan və Cənubi Kivu əyalətinin keçmiş paytaxtı sayılan Bukavu şəhəri 2025-ci ilin fevralından etibarən "23 mart Hərəkatı" (M23) və AFC alyansının üsyançı qruplaşmasının nəzarəti altındadır. Ruandanın dəstəklədiyi bu silahlı birləşmə Konqonun şərqində sürətli hücumlar həyata keçirərək bir neçə böyük şəhəri ələ keçirib. KDR-in şərqində 30 ildən artıqdır davam edən və milyonlarla insanın həyatına son qoyan münaqişə Afrikanın müasir tarixində ən qanlı toqquşmalardan biri hesab olunur.
