Seul məhkəməsi Cənubi Koreyanın video oyun sənayesi maqnatı və "Smilegate" şirkətinin qurucusu Kvon Hyok Bini boşanma prosesi çərçivəsində 2 trilyon vondan (təxminən 1.5 milyard dollar) çox təzminat ödəməyə məcbur edib.
Oxu.Az xəbər verir ki, bu barədə NDTV məlumat yayıb.
Bildirilib ki, bu, ölkə tarixində indiyədək məhkəmə tərəfindən təyin olunmuş ən böyük əmlak bölgüsü məbləğidir.
Nikahın pozulması zamanı məhkəmə hər iki tərəfin ailənin dağılmasında bərabər dərəcədə məsuliyyət daşıdığını qəbul edib. Qərara əsasən, Kvon "Smilegate"dəki təqribən 2.5 trilyon von dəyərində olan 35 faizlik payını təhvil verməli və əlavə olaraq nağd şəkildə 65 milyard von ödəməlidir.
Sözügedən milyarder "Smilegate" şirkətinin əsasını 2002-ci ildə qoyub və sonradan onu Cənubi Koreyanın ən nəhəng oyun korporasiyalarından birinə çevirməyi bacarıb. Məhkəmənin qiymətləndirməsinə görə, iş adamının aktivləri təxminən 8 trilyon von təşkil edir.
Kvonun keçmiş həyat yoldaşı 2022-ci ilin noyabr ayında boşanma üçün ərizə verərək, onun şirkətdəki payının yarısını tələb etmişdi. Qadın iddia edirdi ki, "Smilegate"in yaradılmasında və ilkin mərhələdə idarə olunmasında iştirak edib, həmçinin ev işləri ilə məşğul olaraq biznesin inkişafına töhfə verib. Sahibkar isə onun həmtəsisçi olmadığını və şirkətin idarə edilməsində heç bir rol oynamadığını israrla bildirirdi.
