ABŞ-nin Şimali Karolina ştatında bir qadın lotereyada 1 milyon dollar udub.
Oxu.Az "People" nəşrinə istinadən xəbər verir ki, Şeril Bax adlı qadın ərzaq mağazasından aldığı lotereya bileti sayəsində böyük məbləğ qazanıb.
"Eynəyimi taxmalı oldum ki, hər şeyi doğru gördüyümə əmin olum", - deyə şanslı qalib sevincini bölüşüb.
Şeril Bax qələbə xəbərini dərhal ərinə çatdırıb. Cütlüyə iki seçim təklif olunub: 20 il ərzində hər il 50 min dollar almaq və ya dərhal 600 min dollar götürmək. Onlar ikinci variantı seçiblər. Vergiləri ödədikdən sonra cütlüyün payına təxminən 430 min dollar düşüb.
Qadın bildirib ki, 31 il ərzində onun və ərinin heç vaxt bal ayına getmək imkanı olmayıb. İndi isə bu pulu xəyallarındakı istirahət üçün xərcləməyi planlaşdırırlar.
