Luvr nümayəndələri muzeyin təhlükəsizliyinin artırılması işləri üçün açıq tender elan ediblər.
Oxu.Az xəbər verir ki, bu barədə məlumatı "RİA Novosti" müvafiq sənədlərə istinadən yayıb.
Tenderdə iştirak üçün ərizələr 2025-ci il dekabrın 3-nə qədər təqdim edilə bilər. Podrat müqaviləsinin predmeti baş plan çərçivəsində muzeyin təhlükəsizliyinin təmin edilməsi işləridir. Tenderdə qalib gələn iştirakçı 7.5 il müddətinə müqavilə bağlamaq hüququ qazanacaq.
Nəşrin qeyd etdiyi kimi, tenderin büdcəsi və konkret işlərin növləri dəqiqləşdirilməyib. Luvr komandası işi altı mərhələdə təşkil etməyi planlaşdırır. Təhlükəsizliyin təmin edilməsi üçün bütün vəsait muzeyin büdcəsindən ayrılacaq.
Luvrun direktoru Lorans de Kar bildirib ki, muzey təhlükəsizlik tədbirlərinin gücləndirilməsi çərçivəsində 2026-cı ilin sonuna qədər 100 xarici videomüşahidə kamerası quraşdıracaq.
Əlavə təhlükəsizlik tədbiri kimi isə muzeyin ərazisində müasir polis məntəqəsi yerləşdiriləcək.
