Madaqaskarın şərq sahillərini güclü tropik "Gezani" siklonu vurub.
Oxu.Az-ın TASS-a istinadən xəbərinə görə, bu barədə ölkənin Milli Fəlakət Risklərinin İdarə Edilməsi Bürosunun kommünikesində məlumat verilib.
Ada ölkəsinin əsas limanı olan Tuamasina ən çox zərər görüb. İlkin məlumatlara görə, şəhərin bir neçə məhəlləsi dağılıb - yaşayış binaları dağılıb, bir çox binanın damları uçub və ağaclar kökündən çıxıb. Ampanalana məhəlləsində 900 evdən yalnız bir neçəsi zərər görmədən qalıb. İnsanlar, hətta müvəqqəti sığınacaq mərkəzlərində belə sığınacaq tapa bilmirlər, hansı ki, o mərkəzlərə də ziyan dəyib. Xilasedicilər fırtınanın nəticələrinin öhdəsindən gəlməkdə çətinlik çəkirlər.
Siklon hazırda ölkənin mərkəzi hissəsinə doğru hərəkət edir.
Madaqaskar əhalisinə "Gezani" siklonunun yaxınlaşması barədə əvvəlcədən xəbərdarlıq edilib, siklonun episentrində küləyin sürəti saatda 250 km-ə çatır. Məktəblərdə dərslər müvəqqəti olaraq dayandırılıb. Milli "Madagascar Airlines" aviaşirkəti fevralın 11-nə bütün uçuşları ləğv edib.
Sinoptiklər siklonun Madaqaskarın şərq sahili boyunca təxminən beş-altı bölgəyə təsir edəcəyini və güman ki, daha sonra mərkəzi dağlıq əraziləri vuracağını gözləyirlər. Fırtına gücündə küləklərin güclü yağışla müşayiət olunacağı və 24 saat ərzində 100-150 mm yağıntının düşəcəyi gözlənilir. Daşqın və torpaq sürüşmələri də istisna edilmir.
