Cavad Zərifin istefasının detalları MƏLUM OLDU

İran prezidentinin strateji məsələlər üzrə köməkçisi Məhəmməd Cavad Zərif, İslam Respublikasının məhkəmə hakimiyyətinin rəhbəri Qolam Hüseyn Möhseni-Əjhayi ilə görüşdən sonra istefa vermək qərarına gəldiyini açıqlayıb.

Oxu.Az-ın məlumatına görə, bu barədə o, "X" sosial şəbəkə hesabında paylaşım edib.

"Dünən məni çox hörmətli məhkəmə hakimiyyətinin rəhbəri görüşə dəvət etdi. O, ölkədəki mövcud vəziyyəti nəzərə alaraq, hökumətə qarşı təzyiqlərin artmasının qarşısını almaq üçün universitetə (müəllimliyə) qayıtmağı tövsiyə etdi", - deyə Zərif bildirib.

O, Prezident Məsud Pezeşkianı dəstəkləməkdən qürur duyduğunu və ona, eləcə də xalqın xidmətçilərinə uğurlar arzuladığını bildirib.

Zərifin sözlərinə görə, son altı ay ərzində böhtan, təhqir və təhdidlərlə üzləşib, lakin ölkəsinə xidmət etməyə davam edib.

Qeyd edək ki, bu, Zərifin hazırkı İran hökuməti dövründə ikinci istefa cəhdi olub. İlk dəfə o, avqustun 11-də - vəzifəyə təyin olunduqdan cəmi on gün sonra istefa ərizəsi təqdim edib. O zaman Zərif qərarını "öz işindən narazılığı" ilə izah etmişdi. O, Pezeşkianın prezident seçilməsindən sonra yaradılan və yeni Nazirlər Kabinetinə namizədləri seçməkdən məsul olan məsləhət şurasının rəhbəri kimi fəaliyyətindən narazı olduğunu bildirmişdi. Lakin həmin vaxt prezident onun istefasını qəbul etməmiş və onu vəzifədə qalmağa razı salmışdı.

01:00

İran prezidentinin strateji məsələlər üzrə köməkçisi Məhəmməd Cavad Zərif istefa verib.

Oxu.Az "Azad İran" "Telegram" kanalına istinadla xəbər verir ki, vitse-prezident M.C.Zərifin istefası İran Prezidenti Məsud Pezeşkian tərəfindən hələ təsdiqlənməyib.

Qeyd edək ki, həssas vəzifələr haqqında qanuna əsasən, M.C.Zərifin iki övladının ikili vətəndaşlığa malik olması səbəbindən vitse-prezidentlərdən biri təyin olunması qanunun açıq şəkildə pozulması və bu qanunun açıq mətninə zidd hesab edilir.

Bəzi parlament üzvləri onun qeyri-qanuni olaraq strateji məsələlər üzrə müavin təyin edilməsi məsələsini hökumət işə başlayandan bəri qaldırıblar.

Qeyd edək ki, bu gün səhər İran parlamentinin üzvləri iqtisadiyyat naziri Əbdünnaser Hemmətinin impiçmentinə səs veriblər.

Məlumata görə, ümumilikdə 273 səsdən, 182 səs iqtisadiyyat nazirinin impiçmentinin lehinə, 89-u əleyhinə, ikisi isə bitərəf olub.