Məhkəmə Gürcüstanın sabiq müdafiə nazirinə hökm oxuyub

Tbilisi şəhər məhkəməsi Gürcüstanın sabiq müdafiə naziri İrakli Okruaşviliyə qarşı qaldırılmış cinayət işi üzrə məhkəmə prosesində qərar çıxarıb.

Oxu.Az xəbər verir ki, bu barədə "TV Pirveli" televiziya kanalı məlumat yayıb.

Belə ki, İ.Okruaşvili 20 min lari (təxminən 13 min manat - red.) girov müqabilində sərbəst buraxılıb. Bununla belə, məhkəmə araşdırması bitənə qədər onun Gürcüstan sərhədlərini keçməsi qadağandır.

Xatırladaq ki, Gürcüstan parlamentinin xüsusi istintaq komissiyası 2003-2012-ci illərdə mövcud olan hakimiyyətin fəaliyyətini araşdırır. Komissiya bu ilin fevralından işinə başlayıb və artıq iş adamları, keçmiş hərbçilər və məmurların ifadələri alınıb. Ötən gündən komissiyanın mandatı genişləndirilib. Araşdırma dövrü yalnız 2003-2012-ci illəri deyil, həmçinin 2003-cü ildən bu günədək olan müddəti də əhatə edəcək.

Qeyd edək ki, İ.Okruaşvili Gürcüstanın müdafiə naziri vəzifəsini 2004-2006-cı illərdə tutub.