Misirin Hurgada şəhərində batiskafın batması ilə bağlı dəhşətli fakt ortaya çıxıb. Məlum olub ki, sualtı qayığın heyəti səfər öncəsi turistlərə üzməyi bacarmadıqlarını etiraf ediblər.
Oxu.Az xəbər verir ki, bu barədə "Shot" "Telegram" kanalı məlumat yayıb.
Turistlər bu açıqlamaya əvvəlcə inanmaqda çətinlik çəkiblər və bəziləri bunu yersiz zarafat kimi qəbul ediblər. Ancaq sağ qalanların sözlərinə görə, batiskaf sərnişinlər hələ tam şəkildə müşahidə bölməsinə enməmiş açıq lyuklarla suya dalmağa başlayıb.
Məlumata görə, moskvalı bir nənə və baba 7-8 yaşlı iki nəvəsi ilə birlikdə sualtı mərcan rifini seyr etmək üçün bilet alıblar. Lakin uşaqlar minməzdən əvvəl ayaqyoluna getdikləri üçün ailə bir qədər gecikib. Onlar göyərtəyə qalxdıqda orada hələ azı 5 nəfər olub. Bu zaman batiskaf gözlənilmədən suya dalmağa başlayıb.
"Nə baş verdiyini dərhal anladım, uşaqları körpüyə atdım və başqa bir kişi ilə birlikdə insanları xilas etməyə çalışdıq. Qayıq bir göz qırpımında suyun altına getdi", - deyə sağ qalanlardan biri bildirib.
Faciədən sonra xilas olanlar üç saat ərzində polis tərəfindən sorğu-suala tutulublar. İlkin versiyalara əsasən, hadisə ya heyətin səhvi, yəni vaxtından əvvəl suya dalma, ya da gəminin texniki nasazlığı səbəbindən baş verib.
Xatırladaq ki, Misirdə içərisində rusiyalı turistlərin olduğu "Sindbad" turist batiskafı ekskursiya zamanı batıb. Faciə nəticəsində ikisi uşaq olmaqla altı nəfər həlak olub, yeddi yaralı hələ də xəstəxanadadır.
