"Nissan"dan radikal addım: Zavodlarının yarısını bağlayır

Yaponiyanın "Nissan Motor Co." avtomobil istehsalçısı biznesin yenidən qurulmasına yönəlmiş "Re:Nissan" adlı yeni bərpa planını təqdim edib. Sənaye nəhəngi 2027-ci ilə qədər 20 min iş yerini (buraya daha əvvəl elan olunmuş 9 min ixtisar daxildir) ləğv etməyi və avtomobil zavodlarının sayını 17-dən 10-a endirməyi planlaşdırır.

Oxu.Az-ın məlumatına görə, bu barədə məlumat şirkətin rəsmi saytında dərc olunub.

Plana əsasən, "Nissan" Yaponiyada nəzərdə tutulan akkumulyator zavodunun tikintisindən imtina edəcək, həmçinin avtokomponentlərin istehsalı üzrə əməliyyatları optimallaşdıracaq.

Şirkət 2025-ci maliyyə ili üçün xalis və əməliyyat mənfəəti ilə bağlı proqnoz verməkdən imtina edib. Bu qərar gömrük rüsumlarının mümkün təsirləri ilə bağlı qeyri-müəyyənliklə əsaslandırılıb.

"Re:Nissan" planı çərçivəsində illik xərclərin 500 milyard yen (təxminən 3.4 milyard ABŞ dolları) azaldılması nəzərdə tutulur.

Şirkət yaxın dövrdə bazar rəqabətinin artması, valyuta dəyişkənliyi və inflyasiya təzyiqləri fonunda mürəkkəb biznes mühitinin davam edəcəyini proqnozlaşdırır.

Məlumata görə, Tokio birjasında "Nissan"ın səhmləri 3% bahalaşıb, lakin ilin əvvəlindən bəri şirkətin bazar dəyəri 25.7% azalıb.