Nümayəndələr Palatasının keçmiş spikeri Nensi Pelosi: "Prezidentin qərarı utancvericidir"

ABŞ Konqresinin Nümayəndələr Palatasının keçmiş spikeri Nensi Pelosi Prezident Donald Trampın 2021-ci ilin yanvarında Kapitoliyə hücumda iştirak üzrə məhkum edilənləri əfv etmək qərarını "utancverici" adlandırıb.

Oxu.Az-ın xəbərinə görə, bu barədə "Sky News" nəşri məlumat verib.

"Prezidentin hakimiyyətin dinc yolla keçidini pozmaq cəhdini dayandırmaq üçün həyatlarını riskə atan polis məmurlarını tərk etməyi və onlara xəyanət etməyi özünün əsas prioritetlərindən biri olaraq təyin etməsi utancvericidir", - deyə Pelosi bildirib.

Onun sözlərinə görə, Trampın qərarına baxmayaraq, insanlar demokratiyanın müdafiəçilərini xatırlamalıdırlar.

Xatırladaq ki, 6 yanvar 2021-ci ildə respublikaçı Donald Trampın tərəfdarları Kapitoli binasına hücum ediblər. Siyasətçi məğlub olduğu 2020-ci il prezident seçkisinin nəticələrini ləğv etməyə çağırıb. Hücum Kapitoli binasının təxliyəsinə və bağlanmasına səbəb olub, həmçinin seçicilərin səslərinin hesablanması və Co Baydenin qələbəsinin rəsmiləşdirilməsi üçün Konqresin birgə sessiyasının işini dayandırıb.