Bu gün Rusiya Federasiyasının Orenburq vilayətində strateji sənaye müəssisələrinə pilotsuz uçuş aparatları (PUA) ilə hücumlar qeydə alınıb.
Bu barədə Oxu.Az Kuzbass-seqodnya.rf-ə istinadən xəbər verir.
Orsk şəhərindəki neft emalı müəssisəsinə edilən PUA zərbəsi nəticəsində yanğın başlayıb. Yerli sakinlər və fövqəladə hallar xidmətləri hava zərbəsinin əsas hədəfinin "Orsknefteorqsintez" neft emalı zavodu olduğunu bildirirlər. Orskun bir neçə yaşayış massivindəki şahidlər ardıcıl güclü partlayış səsləri eşidiblər, bundan sonra texnoloji qurğuların ərazisindən qatı qara tüstü qalxıb.
Monitorinq kanallarının ilkin məlumatlarına görə, kamikadze dronlarından biri müdafiə sədlərini keçərək birbaşa istehsalat sexinin yaxınlığında partlayıb. Bununla yanaşı, yerli mexanika zavoduna da hücum cəhdi barədə məlumatlar daxil olur və orada infrastrukturun zədələnməsi ilə bağlı xəbərlər yoxlanılır.
Regionun digər strateji obyektlərinin təhlükəsizliyini təmin etmək üçün Mednoqorsk və Orenburqda hüquq-mühafizə orqanları gücləndirilmiş iş rejiminə keçirilib. Vilayət ərazisində rəsmi şəkildə dron təhlükəsi elan olunub, "Rosaviasiya" qurumu isə mülki aviasiya uçuşlarına müvəqqəti məhdudiyyətlər qoyub.
Tətbiq edilən xüsusi "Xalça" planı səbəbindən yerli aeroportların fəaliyyəti dayandırılıb. Bu səbəbdən təyyarə reysləri Ural və Sibir bölgələrində yerləşən alternativ hava limanlarına istiqamətləndirilir.
Şəhər meri Artyom Vorobyov Novotroitsk və Qay əhalisini sakitliyi qorumağa, pəncərələrə yaxınlaşmamağa və yalnız Müdafiə Nazirliyinin məlumatlarına inanmağa çağırıb.
Hazırda Orsk neft emalı zavodunda fövqəladə vəziyyətin nəticələrinin aradan qaldırılması üçün genişmiqyaslı qərargah yaradılıb, əraziyə gücləndirilmiş yanğından mühafizə dəstələri və FHN-in xüsusi texnikası cəlb olunub.
Xilasetmə qüvvələri alovun içərisində xam neft və yanacaq olan digər rezervuarlara keçməsinin və partlayışın qarşısını almaq məqsədilə yanğını lokallaşdırmağa cəhd edirlər.
Sənaye obyektlərindəki dağıntıların dəqiq miqyası və zavodun növbətçi heyəti arasında mümkün zərərçəkənlər barədə məlumatlar hazırda aidiyyəti qurumlar tərəfindən ətraflı şəkildə dəqiqləşdirilir.
