Moskva Zooparkı vaxtilə kolumbiyalı məşhur narkobaron Pablo Eskobara məxsus olmuş və hazırda sayları nəzarətdən çıxan "kokain begemotları"nın nəslini xilas etmək üçün böyük bir plan açıqlayıb. Plana əsasən, bu heyvanlar Rusiya və dünyanın digər ölkələrinə köçürüləcək.
Oxu.Az xəbər verir ki, bu barədə Moskva Zooparkının rəsmi "Telegram" kanalı məlumat yayıb.
Bu qlobal əməliyyat Moskva Zooparkının baş direktoru və Qlobal Zooparklar Birliyinin Prezidenti Svetlana Akulovanın təşəbbüsü ilə yaradılmış beynəlxalq təşkilatın himayəsi altında həyata keçirilir. Birlik artıq Kolumbiya hökumətinə rəsmi müraciət göndərərək, yerli ekosistemə ziyan vurduğu üçün öldürülməsi planlaşdırılan heyvanların məhv edilməməsini, bunun əvəzinə dünyanın müxtəlif akkreditə olunmuş mərkəzlərinə köçürülməsini təklif edib.
Kampaniyada əsas rollardan birini Hindistanın Camnaqar şəhərində yerləşən "Vantara" vəhşi təbiət xilasetmə mərkəzi oynayır. Bildirilir ki, mərkəzdə begemotlar üçün bütün təbii şəraitə malik xüsusi mühit yaradılacaq. Bundan başqa, Avropa, Latın Amerikası, Afrika və Asiyadakı bir çox aparıcı zooparklar da layihəyə hər cür dəstək verməyə hazır olduqlarını bəyan ediblər.
Hazırda mütəxəssislər heyvanların müxtəlif qitələr və ölkələr arasında düzgün bölüşdürülməsi üzərində işləyirlər. Buradakı əsas elmi məqsəd eyni nəsildən çoxalan heyvanlar arasında məhdud genofond problemini minimuma endirməkdir.
Söhbət 1980-ci illərdə Pablo Eskobarın Afrikadan qanunsuz yollarla özünün "Asienda Napoles" (Hacienda Nápoles) malikanəsinə gətirdiyi dörd begemotun törəmələrindən gedir. Narkobaronun 1993-cü ildə polis tərəfindən öldürülməsindən sonra baxımsız qalan heyvanlar malikanədən qaçaraq yerli çaylarda nəzarətsiz şəkildə çoxalmağa başlayıblar və Kolumbiyanın vəhşi təbiətinə yayılıblar.
