Pakistanda keçmiş baş nazir İmran Xanın həbsindən sonra keçirilən etiraz aksiyalarına görə 1000-ə yaxın adam həbs edilib.
Bu barədə yerli mediada xəbər yayılıb.
Bildirilir ki, qanun pozucuları iğtişaşlar yaradıb, məmurların evlərini yandırıb, polis məntəqələrini dağıdıblar. Etirazlar zamanı artıq 130-dan çox polis əməkdaşı və məmur yaralanıb. Bundan başqa iğtişaşlar zamanı etirazçılar arasından azı 8 nəfər həlak olub, 27 nəfər müxtəlif xəsarətlər alıb.
Asayişi qorumaq üçün Daxili İşlər Nazirliyinin tələbi ilə Pəncab əyalətində hərbi qüvvələr yerləşdirilib, həmçinin ölkə daxilində mobil internet xidmətləri dayandırılıb, məktəblər və yollar bağlanıb.
O da vurğulanır ki, aksiyalar Böyük Britaniya, ABŞ və Kanada daxil olmaqla digər ölkələrdə də keçirirlər.
Qeyd edək ki, mayın 9-da Xan İslamabadın Ali Məhkəməsinin binasında “Əl Qadir” şirkətinin vəsaitlərinin mənimsənilməsi işi üzrə İslam Respublikasının Daxili İşlər Nazirliyinin nümayəndələri tərəfindən saxlanılıb. Dünən keçirilən məhkəmə zamanı o, səkkiz gün müddətinə həbs edilib.
Mənbə: Gazeta.ru
