Romada Santa Mariya Maccore bazilikasında Roma Papası Fransiskin məzarında şokedici bir səhv aşkar edilib.
Oxu.Az bu barədə rg.ru-ya istinadla xəbər verir.
Bildirilir ki, Müqəddəs Atanın dəfn mərasimindən bir neçə saat əvvəl bir çox möminlərin diqqətini bir qüsur - mərmər məzar üzərində həkk olunmuş "Franciscus" ("Fransisk") adındakı hərflər arasında yolverilməz dərəcədə böyük məsafə cəlb edib. Söhbət "R", "A" və "N" hərfləri arasındakı boşluqdan gedir.
İlk baxışda qüsur əhəmiyyətsiz görünə bilər, lakin formal nöqteyi-nəzərdən səhv böyükdür və hələ antik dövrdə müəyyən edilmiş qanunlara ziddir. Qədim ənənələrə görə, məzar yazıları mükəmməl şəkildə, bütün kalliqrafiya (xəttatlıq) qaydalarına riayət edilərək və normadan ən kiçik kənarlaşma olmadan yerinə yetirilməlidir. Hər hansı bir səhv və ya qeyri-dəqiqlik yolverilməz hesab edilirdi və mərhumun təhqir edilməsi kimi qiymətləndirilə bilərdi.
Papa Fransiskin məzarının üzərində pontifikin sağlığında boynunda daşıdığı yepiskop xaçının surəti yerləşdirilib. Bu xaç onun ruhani xidmətinin və Kilsəyə sədaqətinin rəmzidir. Lakin belə əhəmiyyətli bir atributun mövcudluğu diqqəti Müqəddəs Atanın məzarındakı təəssüf doğuran səhvdən yayındıra bilməyib.
Qeyd edək ki, Papa Fransiskin dəfnindən bir həftədən az müddət keçməsinə baxmayaraq, pontifikin məzarını 70 mindən çox insan ziyarət edib, müşahidəçilərin qeyd etdiyi kimi, onların arasında təkcə möminlər deyil, ateistlər də var.
