Qazaxıstan rusiyalı vitse-spiker və deputatların ölkəyə girişini qadağan etdi

Qazaxıstan hakimiyyəti Rusiya Federasiyası Dövlət Dumasının dörd deputatına və bir keçmiş parlament üzvünə ölkəyə daxil olmağı qadağan edib.

Oxu.Az "Deutsche Welle"yə istinadən xəbər verir ki, qərarın səbəbi bu şəxslərin Qazaxıstan və onun rəhbərliyi barədə ictimai şəkildə təhqiredici və düşmənçilik ifadələri yayması olub.

Beləliklə, "qara siyahı"ya Dövlət Dumasının vitse-spikeri Pyotr Tolstoy, Dumanın Beynəlxalq İşlər Komitəsinin birinci müavini Vyaçeslav Nikonov, "Vahid Rusiya" partiyasının deputatları Yevgeni Fyodorov və Konstantin Zatulin, həmçinin "Rossotrudniçestvo"nun başçısı və keçmiş deputat Yevgeni Primakov daxil edilib.

Onlardan əlavə, "persona non qrata" siyahısına jurnalistlər Tina Kandelaki və Tiqran Keosayan, politoloq Nikita Mendkoviç, rusiyalı filosof Aleksandr Duqin, həmçinin tarixçi Andrey Qrozin də daxil ediliblər.