Rubio: "ABŞ yaxın günlərdə Ukraynada münaqişəyə son qoymaq perspektivlərini müəyyən edə bilər"

ABŞ yaxın bir neçə gün ərzində Ukraynada münaqişənin diplomatik yollarla bitməsinin mümkün olub-olmadığını anlaya biləcək.

Oxu.Az xəbər verir ki, bu barədə "Reuters" ABŞ dövlət katibi Marko Rubionun bəyanatına istinadən məlumat verib.

ABŞ diplomatiyasının rəhbəri vurğulayıb ki, hər iki tərəf sülhə nail olmaq üçün ciddi maraq nümayiş etdirərsə, Vaşinqton münaqişənin həllinə yardım etməyə hazırdır.

Dövlət katibi Ukrayna nümayəndələri ilə bir gün əvvəl Parisdə keçirilən danışıqları müsbət qiymətləndirib. ABŞ yaxın vaxtlarda Vaşinqtonun nizamlanma ilə bağlı təkliflərinə Ukrayna tərəfdən cavab alacağını gözləyir.

Xatırladaq ki, dünən Fransanın paytaxtında ABŞ, Böyük Britaniya, Fransa, Almaniya və Ukrayna diplomatlarının görüşü baş tutub. Danışıqlardan sonra ABŞ Dövlət Departamenti bəyan edib ki, Vaşinqtonun təqdim etdiyi Ukrayna üzrə mümkün sazişin konturları iştirakçılar tərəfindən həvəslə qarşılanıb.