Ən son xəbərləri bizim "WhatsApp" kanalımızda izləyin

Rumıniyada qalmaqal: DİN işçiləri Konqoda muzdlu hərbçilər kimi çalışıblar
Rumıniya Daxili İşlər Nazirliyi öz şəxsi heyəti ilə bağlı genişmiqyaslı araşdırma aparıb və şokedici faktlar üzə çıxarıb. Məlum olub ki, nazirliyin ən azı 11 əməkdaşı Konqo Demokratik Respublikasında özəl hərbi şirkətdə gizli şəkildə işləmək üçün saxta xəstəlik məzuniyyəti vərəqələri təqdim ediblər.
Oxu.Az-ın xəbərinə görə, bu barədə "Digi24" telekanalı məlumat verib.
Məlumata görə, qanunu pozanlar arasında səkkiz jandarm və üç polis əməkdaşı olub ki, onlar Afrika ölkəsində hərbi təlimatçı kimi fəaliyyət göstəriblər. Hakimiyyət orqanlarında xüsusi narahatlıq yaradan fakt odur ki, bu əməkdaşlardan bəzilərinin dövlət əhəmiyyətli məxfi məlumatlara çıxış imkanları olub və bu da milli təhlükəsizlik üçün potensial təhdid yaradır.
Öz "Afrika məzuniyyətləri"ni başa vurduqdan sonra bütün 11 təhlükəsizlik əməkdaşı maneəsiz olaraq Rumıniya Daxili İşlər Nazirliyinin strukturlarında öz vəzifələrinin icrasına qayıdıblar. Hazırda nazirlik araşdırmalarını davam etdirir və qanun pozucularına qarşı cinayət işinin qaldırılması üçün artıq prokurorluğa müraciət edib.
Qeyd edək ki, bu qalmaqal Rumıniyanın Milli Müdafiə Nazirliyində aparılan analoji təhqiqat işindən sonra baş verib. Rumıniyanın Milli Müdafiə Nazirliyində aparılan təhqiqat zamanı isə yeddi fəal hərbi qulluqçunun Konqo Demokratik Respublikasında işləmək üçün uşaqlara qulluqla bağlı valideyn məzuniyyətindən istifadə etdiyi aşkar edilmişdi.
Təhqiqatlar Rumıniya mətbuatında ölkə prezidentliyinə keçmiş namizəd Kelin Corceskuya yaxın olan hərbi təlimatçı Horatsiu Potranın fəaliyyəti ilə bağlı dərc edilən yazılardan sonra başlanıb. Jurnalistlərin məlumatına görə, Potra son üç il ərzində onlarla elit hərbi qulluqçu, xüsusi xidmət əməkdaşı və polis də daxil olmaqla, minə yaxın rumıniyalı muzdlunun Konqoya göndərilməsini təşkil edib.
Bildirək ki, Ruandanın "The New Times" qəzetində dərc olunan xəbərdən sonra vəziyyət beynəlxalq rezonans qazanıb. Qəzetin yazdığına görə, Konqonun Qoma şəhərinin "23 mart hərəkatı" (M23) üsyançı qruplaşması tərəfindən ələ keçirilməsindən sonra Konqo ordusu tərəfində döyüşən 288 avropalı muzdlu əsgər təslim olub və Ruandaya göndərilib. Nəşr vurğulayıb ki, bu muzdluların əksəriyyəti Rumıniya vətəndaşları olub.
Rumıniya Müdafiə Nazirliyi ölkənin xüsusi təyinatlılarının Afrika ölkəsi ərazisində özəl hərbi şirkətin əməliyyatlarında iştirakı ilə bağlı məlumatları rəsmən təkzib edib, lakin hüquq-mühafizə orqanlarının apardığı daxili araşdırmaların nəticələri bunun əksini göstərir.