Yekaterinburq şəhərində əvvəlki illərdə törədilmiş qətllərlə bağlı saxlanılanlar azərbaycanlıların işi Rusiya İstintaq Komitəsinin (İK) Mərkəzi Aparatında araşdırılacaq.
Oxu.Az TASS-a istinadən xəbər verir ki, bu barədə Rusiya İK-nin rəsmi nümayəndəsi Svetlana Petrenko məlumat verib.
Onun sözlərinə görə, işin daha əhatəli, hərtərəfli və obyektiv araşdırılması məqsədilə komitə sədri Aleksandr Bastrıkin cinayət işinin Baş İstintaq İdarəsinə verilməsini tapşırıb.
İstintaqın məlumatına əsasən, təqsirləndirilən şəxslərdən ibarət qrup bir neçə qətl və adam öldürməyə cəhddə iştirak edib. Söhbət aşağıdakı cinayətlərdən gedir: 2001-ci ildə kəsilmiş-deşilmiş xəsarətlərdən vəfat edən Y.F.Paşayevin qətli, 2010-cu ildə sifarişlə F.B.Şirinovun qətlə yetirilməsinə cəhd, 2011-ci ildə odlu silahdan açılan atəş nəticəsində Azərbaycan vətəndaşı İ.B.Hacıyevin qətli.
İstintaq bu cinayətlərin biznes maraqları və nüfuz dairələrinin bölüşdürülməsi zəminində törədildiyini ehtimal edir.
Cinayət işi üzrə altı Rusiya vətəndaşı saxlanılıb. Məhkəmənin qərarı ilə Məzahir Möhbalı oğlu Səfərov, Akif Möhbalı oğlu Səfərov və Ayaz Möhbalı oğlu Səfərov barəsində həbs qətimkan tədbiri seçilib.
Digər şəxslər - Əhliman Səttar oğlu Gənciyev, Şahin Məmmədəli oğlu Lalayev və Bəkir Mehdi oğlu Səfərov barəsində isə inzibati həbs qərarı çıxarılıb.
Petrenko bildirib ki, ilkin məlumatlara görə, saxlanılanlardan biri ürək çatışmazlığı, digəri isə hələ müəyyən edilməmiş səbəbdən ölüb. Ölüm səbəblərinə dair yekun nəticə məhkəmə-tibbi ekspertizasından sonra veriləcək.
İstintaq çərçivəsində 14 axtarış, 11 nəqliyyat vasitəsi və qeyri-yaşayış obyektinin baxışı, 10 şahidin dindirilməsi aparılıb. Təqsirləndirilən şəxslərin ifadələri və cinayət yerlərində göstərdikləri məlumatlar onların hadisələrə birbaşa aidiyyəti olduğunu göstərir.
Petrenko əlavə edib ki, saxlanılanların digər ağır və xüsusilə ağır cinayətlərdə iştirak edib-etmədikləri də araşdırılır.
