Erməni Apostol Kilsəsinin Şirak yeparxiyasının rəhbəri, həbs edilmiş arxiyepiskop Mikael Adjapaxyana qarşı açılmış cinayət işi Ermənistanın baş naziri Nikol Paşinyanın bəyanatları ilə bağlıdır.
Oxu.Az-ın TASS-a istinadla verdiyi məlumata görə, bu barədə keşişin müdafiə heyətinin üzvü Yerem Sarkisyan İrəvanda keçirilən mətbuat konfransında bildirib.
"Arxiyepiskop Mikaellə bağlı proses 4 iyunda başladı. Həmin vaxt baş nazir Nikol Paşinyan sosial şəbəkələrdə ona qarşı yönəlmiş paylaşımlar etməyə başladı. Prokurorluq isə yalnız indi - hakimiyyətin kilsənin din xadimlərini nüfuzdan salmaq kampaniyasına başladığı vaxtda iş açdı", - deyə Sarkisyan qeyd edib.
Xatırladaq ki, Mikael Adjapaxyan konstitusiya quruluşunun zor gücü ilə devrilməsinə çağırış - yəni hərbi çevrilişə təşviqdə ittiham olunur. Cinayət işi 17 iyun 2025-ci ildə açılıb, lakin istintaqın istinad etdiyi ifadələrin 2024-cü ilin fevralına aid olduğu bildirilir.
