Qırğızıstandakı Qələbə (Pobeda - Cəngiş Çokusu) zirvəsinə qalxma mövsümü əlverişsiz hava şəraiti səbəbindən bağlanıb. 2026-cı ildə heç bir alpinist qrupu bu dağın yamacında həlak olmuş rusiyalı Natalya Naqovitsınanın cəsədinə çata bilməyib.
Oxu.Az xəbər verir ki, bu barədə TASS-a Cənubi İnilçek baza düşərgəsinin rəhbəri Dmitri Qrekov məlumat verib.
"Zirvəyə yürüş mövsümü başa çatıb. Hətta baza düşərgəsində belə qarın hündürlüyü artıq yarım metrə çatır", - deyə o bildirib.
Onun sözlərinə görə, 2026-cı ildə üç qrup zirvəyə qalxmağa cəhd etsə də, onlardan heç biri 7 min metrdən çox hündürlükdə yerləşən Naqovitsınanın öldüyü yerə yaxınlaşa bilməyib. Qrekov qeyd edib ki, yalnız bir qrup ən uzaq məsafəyə - 6500 metrə qədər irəliləyə bilib.
Rusiya Alpinizm Federasiyasının klassik alpinizm komitəsinin rəhbəri Aleksandr Yakovenko daha əvvəl bildirmişdi ki, Qırğızıstandakı Qələbə zirvəsinin yüksək çətinlik dərəcəli sahələrindən təxliyə ilə bağlı alpinizm təcrübəsində heç bir presedent qeydə alınmayıb.
Xatırladaq ki, 12 avqust 2025-ci ildə "Pobeda" zirvəsinə qalxarkən 7200 metr hündürlükdə ayağı qırılan Naqovitsına hərəkət etmək qabiliyyətini itirmişdi. Həmkarları və xilasedicilər tərəfindən onu xilas etmək üçün bir neçə cəhd göstərilsə də, heç bir nəticə verməmişdi.
Rusiyanın Qırğızıstandakı səfiri Sergey Vakunovun TASS-a verdiyi əvvəlki açıqlamasına görə, Rusiya qohumlarından müraciət daxil olacağı və imkanlar yol verəcəyi təqdirdə Naqovitsınanın cəsədinin axtarışı imkanını nəzərdən keçirməyə hazırdır.
