Rusiyalı səyahətçi ilkə imza atdı: Cənubi Atlantikanı avarlı qayıqla keçdi

Rusiyalı səyahətçi Fyodor Konyuxov Cənubi Atlantikanı (Atlantik okeanının cənub hissəsi - red.) avarlı qayıqla keçən tarixdə ilk şəxs olub.

Oxu.Az-ın xəbərinə görə, bu barədə səyahətçinin "Telegram" kanalında məlumat verilir.

Məlumatda bildirilir ki, ötən gecə Konyuxovun idarə etdiyi "AKROS" qayığı 20 dərəcə Şərq uzunluğunu (İynə burnu - digər adı Aqulhas burnu - Cənubi Afrika Respublikası - red.) keçərək Hind okeanına daxil olub.

Qeyd edilir ki, Fyodor Konyuxov "qəzəbli əllincilər" və "gurultulu qırxıncı illər" enliklərində ən çətin və təhlükəli marşrutla Cənubi Atlantikanı keçib. Bunu etmək üçün ona 68 gün lazım olub.

Qeyd edək ki, 2024-cü il dekabrın 1-də Fyodor Konyuxov yeni ekspedisiyaya başlayıb. Ekspedisiyada Qorn burnundan (Qorn adasında yerləşən Odlu Torpaq arxipelaqının ən cənub nöqtəsi - red.) yola çıxaraq, Argentinanın Uşuaya limanından Avstraliyaya qədər qayıqla Cənubi okeanı (Sakit, Atlantik və Hind okeanlarının Antarktidanı əhatə edən hissələri) keçmək nəzərdə tutulurdu. Planlaşdırıldığına görə, səfər təxminən 200 gün çəkməli idi. Fevralın 4-də onun oğlu məlumat vermişdi ki, atası Cənubi Atlantikada fırtınanın episentrinə düşüb.

73 yaşlı səyahətçi beş dəfə təkbaşına dünya ətrafında dövrə vurub və 17 dəfə Atlantik okeanını keçib.

Rusiyalı səyahətçi ilkə imza atdı: Cənubi Atlantikanı avarlı qayıqla keçdi