İsrailin müdafiə naziri: "İranın nüvə proqramını pozmaq üçün əməliyyatları davam etdirəcəyik"

"İsrail Müdafiə Qüvvələri (IDF-SAXAL) İranın nüvə proqramını pozmaq üçün əməliyyatları davam etdirəcək".

Oxu.Az-ın İsrail KİV-ə istinadən verdiyi xəbərə görə, bu barədə İsrailin müdafiə naziri İsrael Kats bildirib.

"İran təcavüzkar fəaliyyətlərini davam etdirdikcə get-gedə daha yüksək bədəl ödəyəcək", - deyə o vurğulayıb.

Eyni zamanda, Kats SAXAL-ı "Yüksələn aslan" əməliyyatının uğurlu başlanğıcı münasibətilə təbrik edib və onun nəticələrini İsrail ordusunun "parlaq nailiyyəti" adlandırıb.

"İsraili məhv etmək planının həyata keçirilməsinə cəlb edilmiş SEPAH komandirlərinin, İran ordusunun və nüvə alimlərinin hər birinin başlarına hədəflənmiş zərbə güclü və aydın mesajdır - İsrailin məhv edilməsi üzərində işləyən hər kəs məhv ediləcək", - deyə İsrael Kats qeyd edib.

Öz növbəsində ordunun mətbuat xidməti bildirib ki, İsrail Hərbi Hava Qüvvələri İranın qərbindəki hərbi hədəflərə irimiqyaslı zərbələr dalğasını başa vurub.

Açıqlamaya görə, zərbələrin hədəfi İranın hava hücumundan müdafiə obyektləri olub. Nəticədə onlarla radiolokasiya stansiyası və raket buraxılış qurğusu məhv edilib.

"Bu zərbələr İsrail Hərbi Hava Qüvvələrinin havada hərəkət azadlığını genişləndirir", - deyə ordunun bəyanatında qeyd edilib.

10:27

İsrail Hərbi Hava Qüvvələrinə məxsus 200-dən çox qırıcı təyyarə gecə ərzində İrandakı 100-dən çox hədəfə hücum edib.

Oxu.Az-ın TASS-a istinadən xəbərinə görə, bu barədə İsrail Müdafiə Qüvvələrinin (IDF-SAXAL) mətbuat xidmətindən məlumat verilib.

"Gecə ərzində Hərbi Hava Qüvvələrinə aid 200-dən çox qırıcı təyyarə dəqiq kəşfiyyat təlimatları əsasında bütün İran boyu 100-dən çox hədəfə, o cümlədən İranın yüksəksəviyyəli hərbi liderlərinin sığınacaqlarına hücum edib", - deyə məlumatda bildirilib.

Həmçinin qeyd edilib ki, İsrail ordusu İran rejiminin ən yüksəkrütbəli hərbi komandirlərindən üç nəfəri, o cümlədən Silahlı Qüvvələrin Baş Qərargah rəisini və SEPAH (İslam İnqilabı Keşikçiləri Korpusu) komandanını öldürüb.

"SAXAL İran rejiminin ən yüksəkrütbəli üç hərbi komandirini öldürüb: İran rejiminin silahlı qüvvələrinin baş qərargah rəisi, SEPAH komandiri və Fövqəladə Hallar Komandanlığının rəhbərini", - deyə məlumatda bildirilib.