İran İslam İnqilabı Keşikçiləri Korpusunun (SEPAH) qüvvələri ABŞ-nin İordaniyadakı "Əl-Əzrəq" aviabazasına 10 ballistik raketlə zərbə endirib.
Oxu.Az bu barədə İran dövlət teleradiosuna istinadən xəbər verir.
Məlumata əsasən, SEPAH, həmçinin qoşunların idarəetmə mərkəzini də vurub.
Hadisə ilə bağlı digər təfərrüat açıqlanmır.
İran silahlı qüvvələrinin ABŞ-nin hərbi bazalarına hücumları davam edir.
Oxu.Az xəbər verir ki, bu barədə "Tasnim" agentliyi məlumat yayıb. Bildirilib ki, ABŞ-nin Küveytdəki "Patriot" sistemi, Qətərdəki peyk anteni (erkən xəbərdarlıq qurğusu) və Bəhreyndəki ABŞ ordusunun yanacaq çənləri çox sayda müxtəlif növ dronlar tərəfindən hədəfə alınıb.
Məlumatda o da qeyd olunub, heç bir halda ABŞ prezidentinin məqsəd və istəklərinin gerçəkləşməsinə imkan verilməyəcək və İslam İnqilabının ali ideallarını son qələbəsinə qədər müdafiə ediləcək.
İslam İnqilabı Keşikçiləri Korpusunun (SEPAH) Hərbi Dəniz və Hava-Kosmik Qüvvələri ABŞ-nin Küveyt və Bəhreyndə yerləşən hərbi bazalarını hədəfə alıb.
Oxu.Az xəbər verir ki, bu barədə İranın dövlət teleradio şirkəti SEPAH-ın bəyanatına istinadən məlumat yayıb.
"SEPAH-ın Hərbi Dəniz və Hava-Kosmik Qüvvələrinin döyüşçüləri ABŞ-nin ölkənin müxtəlif bölgələrinə etdiyi hücumlardan dərhal sonra həyata keçirdikləri birgə raket və dron əməliyyatı nəticəsində Küveytdəki "Əli əs-Saləm" və "Arifcan", həmçinin Bəhreyndəki "Əl-Cüfeyr" və "Şeyx-İsa" adlı Amerika bazasının əsas obyektlərini və infrastrukturunu sıradan çıxarıb", - deyə açıqlamada qeyd olunub.
SEPAH xəbərdarlıq edib ki, əgər ABŞ-nin hücumları təkrarlanarsa, Tehran cavab tədbirlərinin miqyasını genişləndirəcək və bu addımlar ABŞ Silahlı Qüvvələrinin Yaxın Şərqdəki digər bazalarına da yönəldiləcək.
Eyni zamanda Bəhreyndə də partlayış səsləri eşidilib. Krallığın Daxili İşlər Nazirliyi hava hücumundan müdafiə xəbərdarlığı sistemlərinin işə düşdüyünü bildirib.
"Həyəcan siqnalı səslənib. Vətəndaşlardan və sakinlərdən təmkinli olmaq və ən yaxın təhlükəsiz sığınacağa getmək xahiş olunur", - deyə nazirliyin "X" səhifəsində dərc olunan bəyanatda vurğulanıb.
Küveytin Silahlı Qüvvələrinin Baş Qərargahı isə bildirib ki, hava hücumundan müdafiə (HHM) sistemləri raketlər və pilotsuz uçuş aparatlarının iştirakı ilə həyata keçirilən hücumu dəf edir.
"Hazırda Küveytin HHM sistemləri düşmənin raket və dron zərbələrinə qarşı mübarizə aparır", - qurumun "X" sosial şəbəkəsindəki açıqlamasında qeyd olunub.
