Serbiyanın ən iri aviaşirkəti Rusiyaya uçuşları məhdudlaşdırır

Serbiyanın ən iri aviaşirkəti olan "Air Serbia" Rusiyanın Kazan (Tatarıstan Respublikası) və Soçi (Krasnodar diyarı) şəhərlərinə reysləri dayandıracaq.

Oxu.Az xəbər verir ki, bunu Rusiya Turoperatorlarının Assosiasiyası (RTA) bildirib.

"Air Serbia"nın rezervasiya sisteminə görə, qış cədvəlində Belqrada son reys Kazandan yanvarın 19-da, Soçidən isə yanvarın 20-də həyata keçiriləcək", - təşkilatın teleqram hesabında qeyd olunub.

Serbiya şirkəti reyslərin dayandırılması ilə bağlı rəsmi açıqlama verməyib.

"Air Serbia"nın cədvəlində Belqraddan Moskva və Sankt-Peterburqa reyslər hələ də qalmaqdadır", - RTA vurğulayıb.

Qeyd edək ki, daha əvvəl "Türkmənistan" aviaşirkəti Aşqabad - Moskva - Aşqabad reysini bir ay müddətinə ləğv etmişdi.

Xatırladaq ki, "Azərbaycan Hava Yolları"na məxsus Bakı - Qroznı reysini həyata keçirən "Embraer 190" sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarədə olan 67 nəfərdən 38-i ölüb, 29-u sağ qalıb. Bu hadisədən sonra bir sıra ölkələrin aviadaşıyıcıları Rusiyaya uçuşları məhdudlaşdırıb.

Serbiyanın ən iri aviaşirkəti Rusiyaya uçuşları məhdudlaşdırır