Suriyada keçid hökumətinə tabe olan təhlükəsizlik orqanları Hava Kəşfiyyat Qüvvələrinin keçmiş rəhbəri İbrahim Xuveycanı həbs edib.
Oxu.Az xəbər verir ki, bu barədə Suriyanın SANA dövlət xəbər agentliyi məlumat yayıb.
Bu qurum Suriya hakimiyyətinin dəyişməsindən əvvəl ən güclü təhlükəsizlik xidmətlərindən biri sayılırdı. Xuveyca Cəbla şəhərində keçirilən əməliyyat zamanı daxili təhlükəsizlik idarəsinin əməkdaşları tərəfindən həbs olunub.
Xuveyca 1987-ci ildən 2002-ci ilə qədər Suriya Hava Kəşfiyyat Qüvvələrinin rəhbəri olub. O, 1977-ci ildə livanlı proqressiv-sosialist partiyasının qurucusu və livanlı druzların lideri Kamal Cümbalatın qətlinin təşkilində ittiham olunur.
"Cəbla şəhərindəki qüvvələrimiz yaxşı müşahidə və araşdırmadan sonra HKQ-nin keçmiş rəhbəri briqada generalı İbrahim Xuveycanı həbs ediblər. O, Hafiz Əsədin prezidentliyi dövründə yüzlərlə qətldə təqsirkar hesab edilən, o cümlədən Kamal Cümbalatın qətlini təşkil etməklə ittiham olunan cinayətkardır", - deyə agentliyin xəbərində bildirilir.
Qeyd olunur ki, şəhərdə hələ də sabiq prezident Bəşər Əsədin tərəfdarları ilə qarşıdurmalar davam edir.
