Tənbəllik etmək immunitetin möhkəmlənməsinə müsbət təsir göstərə bilər.
Oxu.Az xəbər verir ki, bu barədə rusiyalı tibb elmləri namizədi, Perm Milli Tədqiqat Politexnik Universitetinin Kimya və Biotexnologiya kafedrasının baş elmi işçisi Valeri Litvinov TASS-a müsahibəsində bildirib.
Mütəxəssis qeyd edib ki, insan tənbəllik etdikdə orqanizmdə stres hormonu olan kortizolun səviyyəsi azalır. Kortizol orqanizmin vacib funksiyalarını, o cümlədən limfa düyünlərində immun hüceyrələrinin yetişməsi üçün zəruri olan genlərin aktivləşməsini məhdudlaşdırır.
Xroniki gərginlik zamanı insanlar viruslara qarşı daha həssas olur, yaralar daha gec sağalır, xəstəlikdən sonrakı bərpa prosesi isə uzun çəkir. Məlum olub ki, dərin istirahət vəziyyətində kortizolun səviyyəsi fizioloji normaya enir. Bu zaman "azad olmuş" immun sistemi daha əvvəl basqılanmış genləri aktivləşdirir və fəal şəkildə antikor istehsal edir.
"Bundan əlavə, kortizolun səviyyəsinin azalması immun hüceyrələrinin virus və bakteriyaları daha tez tanımasına və onlara qarşı effektiv mübarizə aparmasına imkan verir", - deyə Valeri Litvinov qeyd edib.
Ekspert əlavə edib ki, özlərinə istirahət və tənbəllik etməyə imkan verən insanlar daha az xəstələnir və xəstəliklərə daha tez qalib gəlirlər.
