ABŞ ərazisində qanunsuz yaşayan miqrantların Quantanamo həbsxanasının yerləşdiyi hərbi bazaya deportasiya ediləcəkləri ilə bağlı informasiya yalandır.
Oxu.Az xəbər verir ki, bunu Ağ Evin sözçüsü Kerolayn Livitt bildirib. O, özünün "X" sosial şəbəkəsindəki səhifəsində yazıb: "Bütün bunlar yalan məlumatlardır. Belə bir şey yoxdur".
Donald Tramp Administrasiyası bu həftə ölkədə qeyri-qanuni qalan minlərlə miqrantı Quantanamo hərbi bazasına köçürməyə başlayacaq.
Oxu.Az-ın xəbərinə görə, bu barədə "The Washington Post" öz mənbələrinə istinadən məlumat verib.
"Deportasiya olunmaq üçün nəzərdən keçirilən əcnəbi vətəndaşlar müxtəlif ölkələrdəndir. Onların arasında dost Avropa ölkələrindən, xüsusilə Böyük Britaniya, İtaliya, Fransa, Almaniya, İrlandiya, Belçika, Niderland, Litva, Polşa, Türkiyə və Ukraynadan, eləcə də dünyanın digər yerlərindən, o cümlədən Haitidən olan yüzlərlə insan var", - deyə məlumatda bildirilib.
Qəzetin mənbələrinə görə, Tramp Administrasiyası çətin ki, vətəndaşları deportasiyaya məruz qalan ölkələrin hökumətlərini xəbərdar etsin. Mətndə deyilir ki, köçürülmə üçün hazırlıqlar 9000 insanın tibbi müayinədən keçirilməsini nəzərdə tutur ki, onların Quantanamoya göndəriləcək qədər sağlam olub-olmadığı müəyyən edilsin.
